दाक्षिणात्य चित्रपटांचा सुपरस्टार अभिनेता महेश बाबू ‘डान्स इंडिया डान्स तेलुगू’ या रिअॅलिटी शोमध्ये त्याची मुलगी सितारा घट्टामनेनीसोबत दिसला. यावेळी त्याची मुलगी सितारा हिने तिचे डान्सिंग स्किल्स दाखवले. महेश बाबू आपल्या मुलीचा डान्स पाहून आनंदी दिसत होता. महेश बाबू आणि नम्रता शिरोडकर यांची मुलगी सितारा ही खूप हुशार असून सोशल मीडियावर चर्चेत असते.
‘डान्स इंडिया डान्स तेलुगू’ चा हा एपिसोड झी तेलुगूवर रविवारी रात्री ९ वाजता प्रसारित होईल. याचाच एक प्रोमो व्हिडीओ सोशल मीडियावर व्हायरल होत आहे. ज्यामध्ये महेश बाबू आपल्या मुलीचा हात हातात घेऊन रेड कार्पेटवर चालताना दिसतोय. तिथे दोघेही ग्रँड एंट्री करत स्टेजवर पोहोचतात. तिथे सितारा इतर स्पर्धकांबरोबर डान्स करते आणि महेश बाबू आपल्या मुलीला डान्स करताना कौतुकाने बघत असतो. तसेच ‘डान्स एका उत्सवाप्रमाणे असतो,’ असं तो या कार्यक्रमात म्हणतो.
दरम्यान, महेश बाबूने दिग्दर्शक त्रिविक्रम श्रीनिवास यांच्यासोबत त्याच्या पुढील चित्रपटाचे शूटिंग सुरू केले आहे. १२ वर्षांनंतर महेश बाबू पुन्हा त्रिविक्रमसोबत चित्रपट करणार आहे. याआधी त्याने श्रीनिवासबरोबर २००५ मध्ये ‘अथाडू’ आणि २०१० मध्ये ‘खलेजा’ सारखे हिट चित्रपट केले आहेत. याशिवाय महेश बाबू दिग्दर्शक एसएस राजामौली यांच्यासोबत बहुप्रतिक्षित चित्रपटात काम करत आहेत. राजामौली सध्या चित्रपटाच्या प्री-प्रॉडक्शनमध्ये व्यग्रो असून पुढील वर्षाच्या अखेरीस ते चित्रपटाचे शूटिंग सुरू करणार आहेत.
