‘कांतारा’ या चित्रपटाची सध्या सगळीकडेच जोरदार चर्चा सुरु आहे. या चित्रपटामध्ये कोणताच दिग्गज अभिनेता नसताना ‘कांतारा’ सुपरहिट ठरला. चित्रपटाबाबत सकारात्मक चर्चा सुरु असताना एक दुःखद बातमी समोर आली आहे. कर्नाटकमधील एका चित्रपटगृहामध्ये ‘कांतारा’ पाहण्यासाठी आलेल्या प्रेक्षकाचं निधन झालं असल्याची माहिती समोर आली आहे. सोमवारी (२४ ऑक्टोबर) ही धक्कादायक घटना घडली.
‘न्यूज १८ डॉट कॉम’च्या वृत्तानुसार राजशेखर असं या मृत प्रेक्षकाचं नाव आहे. सोमवारी कर्नाटक येथील नागमंगला परिसरामध्ये असणाऱ्या व्यंकटेश्वरा चित्रपटगृहामध्ये चित्रपट पाहण्यासाठी राजशेखर पोहोचले. चित्रपटाचा सकाळचा शो पाहण्यासाठी ते मित्रांबरोबर गेले होते.
चित्रपटाचा क्लायमॅक्स सुरु असताना राजशेखर यांच्या छातीमध्ये अचानाक दुखू लागलं. त्यानंतर लगेचच ते चित्रपटगृहाबाहेर आले. मात्र दुखणं अचानक वाढल्याने ते चित्रपटगृहाबाहेरच पडले. तिथेच त्यांना हृदयविकाराचा झटका आला आणि चित्रपटगृहाबाहेरच त्यांनी अखेरचा श्वास घेतला. राजशेखर यांचं वय ४५ वर्ष होतं.
काही मीडिया रिपोर्ट्सनुसार राजशेखर हे थुरुवेकेरे येथील कुनिकेनहल्ली गावचे राहणारे होते. म्हैसुर येथील खासगी महाविद्यालयामध्ये ते काम करत होते. राजशेखर जेव्हा चित्रपट पाहण्यासाठी घराबाहेर पडले तेव्हा ते एकदम ठिक असल्याची माहिती त्यांच्या कुटुंबियांनी प्रसार माध्यमांशी बोलताना दिली. या प्रकरणासंदर्भात नागमंगला पोलीस ठाण्यात केस दाखल करण्यात आली असल्याचीही माहिती समोर आली आहे.
