राज कपूर दिग्दर्शित 'राम तेरी गंगा मैली' हा चित्रपट २५ जुलै १९८५ साली प्रदर्शित झाला. या चित्रपटातून अभिनेत्री मंदाकिनी प्रेक्षकांच्या भेटीला आली. डोळ्यांत वेगळीच चमक असणारी ही अभिनेत्री ‘राम तेरी गंगा मैली’ या चित्रपटाच्या निमित्ताने प्रेक्षकांच्या मनात घर करुन गेली. या चित्रपटातील तिचा साधाभोळा पण, तितकाच मादक अंदाज अनेकांची मनं जिंकून गेला. विशेष म्हणजे या चित्रपटातील मंदाकिनीचं एक गाण प्रचंड गाजलं. मात्र अनेकांनी त्यावर टीकादेखील केली. 'राम तेरी गंगा मैली' या चित्रपटातील 'तुझे बुलाएँ ये मेरी' हे गाणं त्याकाळी प्रचंड गाजलं होतं. या गाण्यामध्ये मंदाकिनीने अनेक बोल्ड सीन दिले असून धबधब्याखाली अंघोळ करतानाचा तिचा व्हिडीओ विशेष गाजला होता. या गाण्यानंतर त्याकाळी असे बोल्ड सीन देणारी अभिनेत्री म्हणून मंदाकिनीकडे पाहिलं जात होतं. 'राम तेरी गंगा मैली' या चित्रपटातून बॉलिवूडमध्ये डेब्यु करणाऱ्या मंदाकिनीचा आलेख या चित्रपटानंतर प्रचंड उंचावला. मात्र त्यानंतर काही कारणांमुळे तिला चित्रपटसृष्टीतून काढता पाय घ्यावा लागला. चित्रपटांमुळे लोकप्रिय ठरलेल्या मंदाकिनीचं नाव मुंबई साखळी बॉम्बस्फोटातील आरोपी, कुथ्यात डॉन दाऊदशीही जोडलं गेलं होतं. दाऊद आणि मंदाकिनीचे प्रेमसंबंध होते अशी चर्चा होती. आम्ही केवळ मित्र आहोत, असं मंदाकिनीने सांगितलं होतं. मात्र दाऊदसोबत नाव जोडले जात असल्याच्या चर्चांना उधाण येताच मंदाकिनी एकाएकी चित्रपटसृष्टीपासून दूर गेली.
