मालिका, नाटक, चित्रपट या तिन्ही माध्यमांमध्ये दमदार काम करणाऱ्या अभिनेत्यांपैकी एक म्हणजे सुयश टिळक. त्यानं आपल्या सुंदर अभिनयानं मराठी मनोरंजनसृष्टीत एक वेगळंच स्थान निर्माण केलं आहे. सध्या त्याचं रंगभूमीवर ‘ज्याची त्याची लव्हस्टोरी’ हे नाटक जोरदार सुरू आहे. त्याच्या या नाटकाला प्रेक्षकांचा उदंड प्रतिसाद मिळत आहे. ‘झी नाट्य गौरव २०२५’मध्ये ‘ज्याची त्याची लव्हस्टोरी’ या नाटकासाठी सुयश टिळकला सर्वोत्कृष्ट अभिनेता या पुरस्कारने गौरविण्यात आलं. १७ वर्षांनी सुयशला सर्वोत्कृष्ट अभिनेत्याचा पुरस्कार मिळाला. या पुरस्कार सोहळ्यानिमित्ताने सुयशने ‘ज्याची त्याची लव्हस्टोरी’ या नाटकादरम्यानचा एका चाहतीचा हृदयस्पर्शी किस्सा सांगितला. याचा व्हिडीओ सध्या व्हायरल होतं आहे.
‘झी मराठी’च्या सोशल मीडियावर सुयश टिळकचा व्हिडीओ शेअर करण्यात आला आहे. ज्यामध्ये सुयश किस्सा सांगत म्हणतो, “आता जे माझं नाटक सुरू आहे ‘ज्याची त्याची लव्हस्टोरी’ त्यासंदर्भात अलीकडेच घडलेला एक किस्सा आहे. या नाटकात मी विवेकची भूमिका करतोय. त्याच्या आयुष्यातली मोठी इनसिक्योरिटी, त्याला आयुष्यात सगळ्यात जास्त कशाची भीती वाटते, ते तो एकेदिवशी सगळ्यांसमोर बोलतो. तर परवा पुण्यात प्रयोग झाला. एक मुलगी आली. तिने माझे हात हातात धरले आणि ती रडायला लागली.”
“तेव्हा मला कळतं नव्हतं काय करायचं. कारण बऱ्याचदा आपण परफॉर्म करताना लक्षातही येत नाही, नकळत आपण किती जणांच्या आयुष्याला अलगद हात लावून जातो. अलगद स्पर्श करून जातो. तिने माझे हात हातात धरले आणि म्हटलं, माझ्या आयुष्यातली सगळ्या मोठी इनसिक्योरिटी तुझ्यामुळे मला बघायला मिळाली. मला नवीन एक प्रेरणा मिळाली आहे. आपण एकटे असलो किंवा आपल्या आयुष्यात आपल्याबरोबर कोणीच नाहीये असं वाटतं असलं तरीसुद्धा आपल्याला छान आयुष्य जगता येतं. हे तिला त्या नाटकातून मिळालं. माझ्यासाठी हा फारच हलवून टाकणारा किस्सा होता,” असा सुयश टिळक म्हणाला.
दरम्यान, ‘ज्याची त्याची लव्हस्टोरी’ या नाटकाचं दिग्दर्शन प्रियदर्शन जाधवने केलं आहे. या नाटकात सुयश टिळक व्यतिरिक्त सुरुची अडारकर, शर्मिला शिंदे, रोहित हळदीकर, पूर्णानंद वांढेकर, शर्वरी बोरकर हे कलाकार पाहायला मिळत आहे.
