मराठी अभिनेत्यांच्या यादीतील टॉप १० अभिनेत्यांपैकी एक म्हणजे सुयश टिळक. त्याने आतापर्यंत अनेक मालिकांमध्ये उत्तमोत्तम भूमिका साकारत प्रेक्षकांच्या मनावर अधिराज्य गाजवलं. मालिकांबरोबरच तो नाट्यक्षेत्रातही प्रचंड सक्रीय असतो. सध्या तो ‘मी स्वरा आणि ती दोघं’ या नाटकात काम करत आहे. सुयश टिळक हा कायमच त्याच्या स्पष्टवक्तेपणासाठी ओळखला जातो. नुकतंच सुयशने शासनाच्या कार्यक्रमांवर टीका केली आहे.
सुयश टिळकने नुकतंच ‘मित्र म्हणे’ या युट्यूब चॅनलला मुलाखत दिली. यावेळी त्याला नाट्यगृहांच्या सध्याच्या दुरावस्थेबद्दल प्रश्न विचारण्यात आला. त्यावर त्याने विविध अडचणींबद्दल सांगितले. त्यावेळी त्याने शासनाचा कार्यक्रम असल्यावर आमच्या नाटकाचे प्रयोग रद्द केले जातात, असे सांगितले.
आणखी वाचा : “…तर मी दोन मुलांची आई असते”, केतकी चितळेच्या पोस्टने वेधलं लक्ष, म्हणाली “वयाच्या चौथ्या वर्षी…”
“नाट्यगृहांबद्दल ज्यांनी काम करायला हवं ते काम करत नाही, असं माझं प्रामाणिक मत आहे. अनेकदा आमचे प्रयोग रद्द केले जातात, कारण शासनाचा कार्यक्रम असतो. महिना, दीड महिना आधी तारीख घेतलेली असते. पण तीन दिवस आधी रद्द असं सांगितलं जातं. तिथे नाटकाला, कलाकारांना, त्यांच्या कलेला काहीही महत्त्व नाही.” असेही तो म्हणाला.
“शासनाचा कार्यक्रम ठरलाय, प्रयोग रद्द. तुम्ही तुमचं बघा. यानंतर मग बुकिंग रद्द होतात. निर्मात्यांना नुकसान होतं, यांसारख्या अनेक गोष्टी होतात. तुम्ही शासनाच्या कार्यक्रमांसाठी ही नाट्यगृह वापरत आहात ना, मग ती चांगल्या सुस्थितीत ठेवण्याची जबाबदारीही कोणीतरी उचलली पाहिजे, जी जबाबदारी कोणीही घेताना दिसत आहे. त्यांच्यासाठी ते तीन तास महत्त्वाचे असतात. ते तीन तास जेव्हा ते तिकडे असतात, तेव्हा बाहेर व्हॅनिटी व्हॅन असतात, त्यामुळे त्यांना ग्रीन रुममध्ये बघावंचं लागत नाही. त्यांच्यासाठी वेगळ्या सुखसोयी असतात. त्यात सुधारणाच होत नाही. मी याबद्दल अनेकदा बोललो आहे, लिहिलं आहे. पण त्यात काहीही बदल होत नाही”, असे सुयश टिळकने सांगितले.
आणखी वाचा : ‘बाईपण भारी देवा’ने मोडला बॉक्स ऑफिस रेकॉर्ड, कमाई पाहून केदार शिंदे म्हणाले, “तब्बल २१ वर्ष…”
दरम्यान सुयशने त्याच्या अभिनय कौशल्याच्या जोरावर कलाक्षेत्रामध्ये स्वतःचं एक वेगळं स्थान निर्माण केलं. ‘का रे दुरावा’, ‘दुर्वा’, ‘पुढचं पाऊल’, ‘बंध रेशमाचे’ यांसारख्या मालिकांमधील त्याच्या भूमिका प्रचंड गाजल्या. सध्या तो ‘मी स्वरा आणि ती दोघं’ या नाटकात काम करत आहे.
