वसंत ऋतुच्या आगमनानंतर येणारा सण म्हणजे गुढीपाडवा. कलाकार मंडळीसुद्धा या खास सणाचं आनंदाने स्वागत करत आहेत. स्टार प्रवाहच्या मालिकांमधील कलाकारांनी गुढीपाडव्याच्या शुभेच्छा देत खास आठवणी शेअर केल्या आहेत.
१. आशुतोष कुलकर्णी (मालिका- साथ दे तू मला)
मी मूळचा पुण्याचा असल्यामुळे गुढीपाडव्याची विशेष आठवण आहे. माझ्या जुन्या घराला बाल्कनी नसल्यामुळे गुढी उभारताना फार कसरत करावी लागे. त्यामुळे नवं घर घेताना आवर्जून मी बाल्कनी असणारं घर घेतलं आणि तेव्हापासून जल्लोषात गुढी उभारली जाते. मला लहानपणी गुढीला घातल्या जाणाऱ्या बत्ताश्यांच्या माळा खायला फार आवडायचं. आता डाएटमुळे शक्य होत नाही. पण शूटिंग नसेल तर आवर्जून मी पुण्याला जाऊन आई-बाबांसोबत उत्साहात हा सण साजरा करतो.
२. संकेत पाठक (मालिका- छत्रीवाली)
गेली अनेक वर्ष मी शूटिंगच्या निमित्ताने मुंबईत असल्यामुळे सेटवरच गुढीपाडवा सेलिब्रेट करतोय. मी नाशिकचा असल्यामुळे माझ्या घरी गुढी दरवर्षी उभारली जाते. लहानपणी मी माझी वेगळी छोटी गुढी उभारायचो. त्या छोट्या गुढीचे छोटे दागिने, छोटी साडी हे साकारताना खुप मजा यायची. गुढीपाडव्याला आमच्याकडे गुळ-पोळीचा खास बेत असतो. आईच्या हातचा हा खास पदार्थ मी खूप मिस करतो.
३. भार्गवी चिरमुले (मालिका- मोलकरीण बाई)
माझी बहिण चैत्रालीचा गुढीपाडव्याला तिथीनुसार वाढदिवस असतो. त्यामुळे आमच्या घरात डबल सेलिब्रेशन असतं. गुढी उभारण्याची धावपळ आणि सोबतीला वाढदिवसाचं सेलिब्रेशन अशी धमाल दरवर्षी आमच्या घरी असते. खास बात म्हणजे गुढीपाडव्याच्या दिवसापासून आमच्या घरी आंबा खायला सुरुवात होते. आमरस-पुरीचा खास बेत यादिवशी असतो. साडी नेसून अगदी पारंपरिक पद्धतीने आम्ही यादिवशी सहकुटुंब गुढीची पूजा करतो. त्यामुळे यादिवसाची खूप खास आठवण आहे माझी.
४. गौरव घाटणेकर ( मालिका – ललित २०५)
गुढीपाडव्याची खास आठवण सांगायची तर मी स्टार प्रवाहसोबत अटेण्ड केलेली गिरगावची भव्यदिव्य शोभायात्रा. ढोल-ताश्यांचा गजर, पारंपरिक वेशभुषेमध्ये सामील झालेले हजारो लोक हे संपूर्ण वातावरणच खूप भारावून टाकणारं होतं. माझ्या आयुष्यातली ही एक अविस्मरणीय आठवण आहे. यंदा मी आणि माझी पत्नी श्रुती पहिला पाडवा साजरा करणार आहोत. गेल्यावर्षी शूटिंगमुळे गुढीपाडवा एकत्र साजरा करणं जमलं नाही. यंदा मात्र आधीच प्लॅनिंग करुन ठेवलंय. त्यामुळे यंदाचा गुढीपाडवा स्पेशल असणार आहे. शिवाय स्टार प्रवाहवरच्या ‘ललित २०५’मध्येही गुढीपाडव्याचं खास सेलिब्रेशन पाहायला मिळणार आहे.
५. प्रिया मराठे (साथ दे तू मला)
मी पक्की ठाणेकर आहे. त्यामुळे लहानपणापासून ठाण्यात साजरा होणारा गुढीपाडवा पाहात आलेय. पहाटे निघणाऱ्या शोभायात्रा, भल्यामोठ्या रांगोळ्या, दिव्यांची आरास आणि दिमाखात झळकणारी गुढी या साऱ्या गोष्टी कायम स्मरणात राहणाऱ्या आहेत. यंदाचा गुढीपाडवा यासाठी स्पेशल आहे कारण गेल्याच वर्षी मीरारोडमध्ये बॉम्बे फ्राईज या आमच्या हॉटेलची सुरुवात झाली. यंदा एका खास मराठमोळ्या गोड मेन्यूसह आम्ही हॉटेलमध्ये गुढी उभारणार आहोत. त्यामुळे यंदाचा गुढीपाडवा मी आणि शंतनू जल्लोषात साजरा करणार आहोत.
