चित्रपटसृष्टीमध्ये कलाकारांच्या अभिनयाची जितकी प्रशंसा होते तितकच त्यांना ट्रोलिंगचा देखील सामना करावा लागतो. नुकताच मराठी चित्रपटसृष्टीमधील अभिनेत्री आणि नृत्यांगना मेघा घाडगे हिच्यासोबत असाच प्रकार घडल्याचे समोर आले आहे. मेघाच्या फोटोवर एका यूजरने अश्लील कमेंट केली आहे. या प्रकरणी तक्रार दाखल करण्यासाठी तिने पोलिसात धाव घेतली. पण पोलिसांनी सुरुवातीला तिची तक्रार घेण्यास टाळाटाळ केल्याचे मेघाने सांगितले आहे. आता नयानगर पोलीसात तक्रार दाखल झाली असून पोलिस आरोपीचा शोध घेत आहेत.
काही दिवसांपूर्वी मेघाने चित्रपटाच्या चित्रीकरणादरम्यान एका सहकलाकारासोबत फोटो काढला होता. तो फोटो तिने तिच्या फेसबुक अकाऊंटवर शेअर केला. त्यानंतर तिने फोटोवरच्या कमेंट वाचल्या. या कमेंटमधील एक कमेंट वाचून तिला धक्काच बसला आहे. सरुप पांडा नावाच्या अनोख्या व्यक्तीने तिच्या फोटोवर अश्लील कमेंट केली होती. तिने या प्रकरणी नयानगर पोलिस ठाण्यात तक्रार दाखल केली. सध्या हा इसाम फरार असून पोलीस त्याचा शोध घेत आहेत.
तक्रार दाखल करण्यास गेलेल्या मेघाने तिचा अनुभव शेअर केला आहे. पोलिसांनी तिला अर्धा तास पोलिस ठाण्यात बसवून ठेवले होते. त्यानंतर पोलिसांनी तिची तक्रार दाखल करण्यास टाळाटाळ केल्याचे सांगितले. तसेच कलाकारांना अशी वागणूक पोलीस देत असतील तर सामान्य माणासाची काय परिस्थीती असेल या शब्दात मेघाने नाराजी व्यक्ती केली आहे.
