बिग बॉस मराठी या रिअॅलिटी शो मधून घराघरात प्रसिद्धीझोतात आलेली अभिनेत्री म्हणून नेहा शितोळेला ओळखले जाते. नेहा ही सोशल मीडियावर कायमच सक्रीय असते. ती नेहमी विविध पोस्ट शेअर करताना दिसते. नुकतंच नेहाने दिग्दर्शक आणि अभिनेते महेश मांजरेकर यांच्यासाठी एक खास पोस्ट शेअर केली आहे. यात तिने महेश मांजरेकर यांचे कौतुक केले आहे.
नेहा शितोळेने इन्स्टाग्रामवर एक पोस्ट शेअर केली आहे. त्यात तिने महेश मांजरेकरांचा एक फोटो पोस्ट केला होता. या फोटोत ती फार आनंदात असल्याचे दिसत आहे. याला तिने हटके कॅप्शन दिले आहे. तिचे हे कॅप्शन सध्या चांगलेच चर्चेत आहे.
नेहा शितोळेची इन्स्टाग्राम पोस्ट
Mahesh Manjrekar – महेश मांजरेकर हा माणूस आयुष्यात नुसता भेटणं सुद्धा जिथे कमाल वाटतं तिथे त्यांनी तुम्हाला appreciate करणं, त्यांच्या सोबत काम करायला मिळणं आणि त्यांचं थोडं प्रेम आपल्या वाट्याला येणं… हे सगळं अविश्वसनीय आहे… धन्यवाद महेश मांजरेकर सर… माझ्यावर विश्वास ठेवल्याबद्दल… एका वेगळया रुपात लोकांसमोर आणल्याबद्दल… माझ्या शब्दांना योग्य न्याय दिल्याबद्दल…, असे नेहा शितोळेने या पोस्टमध्ये म्हटलं आहे.
दरम्यान नेहा शितोळे ही लवकरच गीतकार म्हणून पदार्पण करत आहे. तिने महेश मांजरेकराच्या आगामी दे धक्का २ या चित्रपटासाठी गाणे लिहिले आहे. ‘देह फुटू दे’ असे या गाण्याचे बोल आहेत. अद्याप तिचे हे गाणे प्रदर्शित झालेले नाही. काही दिवसांपूर्वी नेहा ही सेक्रेड गेम्स या वेबसीरिजमध्ये दिसली होती. या वेबसीरिजला नुकतंच चार वर्ष पूर्ण झाली. यानिमित्ताने नेहाने एक खास रीलसुद्धा शेअर केलं होतं.
