सिद्धार्थ जाधव हा नेहमीच विविध कारणांनी चर्चेत असतो. मराठीबरोबरच हिंदी मनोरंजनसृष्टीतदेखील त्याने स्वतःची ओळख निर्माण केली आहे. त्याच्या कामाचं नेहमीच कौतुक होत असतं. पण इथपर्यंत पोहोचण्यासाठी त्याला मोठा संघर्ष करावा लागला आहे. आज एका चित्रपटासाठी लाखो रुपये आकारणाऱ्या सिद्धार्थ जाधवची सिनेसृष्टीतील पहिली कमाई किती होती हे त्याने सांगितलं आहे.
सिद्धार्थ आतापर्यंत अनेक नाटकं, मालिका, चित्रपटांमधून प्रेक्षकांच्या भेटीला आला आहे. मनोरंजन सृष्टीत स्वतःची ओळख निर्माण करत असताना त्याला बराच संघर्ष करावा लागला. तर आज तो बहुआयामी अभिनेता म्हणून ओळखला जातो. सिनेसृष्टीत काम करताना त्याला पहिलं मानधन किती मिळालं होतं आणि त्या पैशांचं त्याने काय केलं याचा खुलासा आता त्याने केला आहे.
आणखी वाचा : “माकड दिसतोय…,” नेटकऱ्याच्या प्रतिक्रियेला सिद्धार्थ जाधवचं चोख उत्तर; म्हणाला…
‘राजश्री मराठी’ला दिलेल्या मुलाखतीत तो म्हणाला, “मी शाळेत होतो तेव्हा माझ्या अंधमित्र-मैत्रिणीसाठी पेपर लिहायला जायचो. त्यावेळी मला ५०० किंवा १ हजार रुपयांचा एक चेक मिळाला होता तो मी घरी दिला होता. त्याला मी कमाई असे म्हणणार नाही. पण मनोरंजन सृष्टीत काम करायला लागल्यावर ‘तुमचा मुलगा करतो काय’साठी मला नाईटसाठी दोनशे रुपये नाईट मिळाले होते. तीच माझी पहिली कमाई असेल कारण मला नक्की आठवत नाही की या क्षेत्रातील माझी पहिली कमाई किती. ते पैसे मी आईला दिले होते.”
तर सिद्धार्थ लवकरच ‘अफलातून’ या चित्रपटातून प्रेक्षकांच्या भेटीला येणार आहे. या चित्रपटाचा ट्रेलर काही दिवसांपूर्वीच प्रदर्शित झाला असून त्याला प्रेक्षकांचा खूप चांगला प्रतिसाद मिळत आहे.
