छोट्या पडद्यावरील ‘फ्रेशर्स’, ‘लाडाची मी लेक गं’ या मालिकांमुळे अभिनेत्री मिताली मयेकर घराघरांत लोकप्रिय झाली. मितालीने वैयक्तिक आयुष्यात २०२१ मध्ये अभिनेता सिद्धार्थ चांदेकरबरोबर लग्नगाठ बांधली. ती सोशल मीडियावर प्रचंड सक्रिय असते. अलीकडेच तिच्या बाली ट्रिपचे फोटो इन्स्टाग्रामवर व्हायरल झाले होते. यंदाच्या वर्षात मिताली स्पेन, फ्रान्स, इंडोनेशिया, बँकॉक असे अनेक देश फिरण्यासाठी गेली होती. २०२३ मध्ये केलेल्या जगभ्रमंतीच्या खास आठवणी मितालीने एका व्हिडीओच्या माध्यमातून शेअर केल्या आहेत.
मितालीने शेअर केलेल्या व्हिडीओमध्ये स्काय डायव्हिंग, निळेशार समुद्रकिनारे, जगभरातील खाद्यसंस्कृतीची झलक पाहायला मिळत आहे. तिच्या मित्र-मैत्रिणींनी या व्हिडीओवर कौतुकाचा वर्षाव केला आहे. याउलट एका नेटकऱ्याने मितालीच्या या व्हिडीओवर नकारात्मक कमेंट केली होती.
“पैसे कुठून येतात…ना चित्रपट, ना मालिका?” असा प्रश्न एका नेटकऱ्याने कमेंट सेक्शनमध्ये उपस्थित केला होता. या प्रश्नावर मितालीने “झाड लावलंय. तुला हव्यात बिया?” असं सडेतोड उत्तर दिलं आहे. यापूर्वी बालीच्या समुद्रकिनाऱ्यावर बिकिनी घातल्यामुळे मितालीच्या लूकवर काही जणांनी नाराजी दर्शवली होती. तेव्हा सुद्धा अभिनेत्रीने अशाचप्रकारे उत्तर देत ट्रोलर्सला सुनावलं होतं.
दरम्यान, मिताली मयेकर सोशल मीडियाच्या माध्यमातून कायम तिच्या चाहत्यांच्या संपर्कात असते. तिच्या वैयक्तिक आयुष्याबद्दल सांगायचं झालं तर, मिताली आणि सिद्धार्थ चांदेकरची जोडी मराठी कलाविश्वात प्रचंड लोकप्रिय आहे. दोघांच्याही लग्नाला येत्या जानेवारी महिन्यात ३ वर्ष पूर्ण होणार आहेत.
