शिवानी सुर्वे व अजिंक्य ननावरे यांची जोडी मराठी कलाविश्वात प्रचंड लोकप्रिय आहे. प्रेक्षकांच्या या लाडक्या जोडीने १ फेब्रुवारीला लग्नगाठ बांधत नव्या आयुष्याची सुरुवात केली. शिवानी-अजिंक्यच्या लग्नातील असंख्य फोटो सोशल मीडियावर व्हायरल झाले आहेत. तसेच या जोडप्याच्या लग्नाला कलाविश्वातील अनेक कलाकारांनी देखील हजेरी लावली होती.
शिवानी सुर्वे – अजिंक्य ननावरे या सेलिब्रिटी जोडप्याने ३१ जानेवारीला गुपचूप साखरपुडा उरकत चाहत्यांना सुखद धक्का दिला होता. गेल्या अनेक दिवसांपासून त्यांच्या लग्नाची सोशल मीडियावर चर्चा सुरू होती. अखेर ही जोडी लग्नबंधनात अडकली आहे. थाटामाटात लग्न केल्यावर अजिंक्य-शिवानी एका सुंदर जागी फिरायला गेल्याचं अभिनेत्याने नुकत्याच शेअर केलेल्या पोस्टमध्ये पाहायला मिळत आहे.
हेही वाचा : “मी मावशी झाले…”, ‘फुलाला सुगंध मातीचा’ फेम समृद्धी केळकरने चाहत्यांना दिली आनंदाची बातमी, म्हणाली…
अजिंक्यने लग्नानंतर पत्नी शिवानी सुर्वेसाठी खास पोस्ट शेअर सर्वांचं लक्ष वेधून घेतलं आहे. यामध्ये दोघंही वेस्टर्न लूकमध्ये पाहायला मिळत आहेत. अभिनेत्रीच्या हातावर सुंदर अशी रंगलेली मेहंदी, तर अन्य इतर काही फोटोंमध्ये कॉफीचे कप व निसर्गाचा व्ह्यू पाहायला मिळत आहे. या फोटोला अजिंक्यने “तेरे ही हम…” हे गाणं जोडलं आहे.
दरम्यान, अजिंक्य-शिवानी जवळपास २०१६ पासून एकत्र आहेत. ‘तू जीवाला गुंतवावे’ या मालिकेच्या सेटवर त्यांची पहिली भेट झाली होती. यानंतर दोघांमध्ये मैत्री व पुढे या मैत्रीचं रुपांतर प्रेमात होऊन आता ही लोकप्रिय जोडी विवाहबंधनात अडकली आहे.
