‘सैराट’ फेम अभिनेता आकाश ठोसर सध्या त्याच्या ‘बाल शिवाजी’ या आगामी चित्रपटामुळे चांगलाच चर्चेत आहे. ‘बाल शिवाजी’ चित्रपटाचे दिग्दर्शन रवी जाधव करणार आहेत. त्याने नुकत्याच शेअर केलेल्या व्हिडीओमुळे तो आगामी चित्रपटासाठी चांगलीच तयारी करत असल्याचे दिसत आहे. आकाशने त्याच्या इन्स्टाग्रामवर सह्याद्रीच्या धबधब्यावर रॅपलिंग करतानाचा थराथर व्हिडीओ शेअर केला आहे. या व्हिडीओत एवढ्या मोठ्या धबधब्यावर अभिनेता बिनधास्त रॅपलिंग करत असल्याचे दिसत आहे.
हेही वाचा : “सहसा मी रडत नाही, पण…”, सुधा मूर्तींनी सांगितला किस्सा; म्हणाल्या, “आलिया भट्टचा अभिनय पाहून…”
अभिनेता आकाश ठोसरने प्रोफेशनल टीमसह सह्याद्रीतील शितकडा येथे रॅपलिंग करण्याचा अनुभव घेतला. या व्हिडीओच्या कॅप्शनमध्ये त्याने “जय शिवराय” असे लिहिले आहे. तसेच सर्वात महत्त्वाचे म्हणजे व्हिडीओच्या खाली आवश्यक सेफ्टी उपकरणे आणि सुरक्षेची काळजी कशी घ्यावी याची माहिती त्याने दिली आहे. आकाश लिहितो, “गिर्यारोहण हे साहसी क्षेत्र आहे. एखाद्या डोंगर सुळक्यावर ट्रेकिंग, क्लायबिंग किंवा रॅपलिंग करायची असेल तर, सर्वप्रथम एखादा रोप, Harness आणि safety equipment या साऱ्याची व्यवस्था करुन एखाद्या प्रोफेशनल टीमच्या निगराणी खाली क्लायबिंग किंवा रॅपलिंग करा.”
“सदर व्हिडीओ हा सगळ्या सेफ्टीचा उपयोग करून एका प्रोफेशनल टीमच्या निगराणी खाली बनवण्यात आला आहे…कोणत्याही धोकादायक वातावरणात प्रवेश करण्यापूर्वी नेहमीच व्यावसायिक सल्ला घ्यावा.” असे आकाशने त्याच्या चाहत्यांना आणि सोशल मीडिया युजर्सला सांगितले आहे.
आकाशने शेअर केलेल्या व्हिडीओवर नेटकऱ्यांनी त्याला “काळजी घेऊन अशी साहसी कृत्ये करत जा.” असा सल्ला दिला आहे. तर दुसऱ्या एका युजरने, “तू सेफ्टीबद्दल माहिती दिलीस हे फार चांगले केलेस..” असे म्हटले आहे. तसेच इतर काही युजर्सनी “जय शिवराय” कमेंट करत आकाशला प्रोत्साहन दिले आहे. दरम्यान, लवकरच अभिनेता ‘बाल शिवाजी’ चित्रपटाच्या माध्यातून प्रेक्षकांच्या भेटीला येणार आहे.
