मराठी चित्रपटसृष्टीमधील टॉपच्या अभिनेत्रींमध्ये अमृता खानविलकरचं नाव आवर्जुन घेतलं जातं. अमृताने मराठी चित्रपटांमध्ये उत्तमोत्तम भूमिका साकारत प्रेक्षकांची मनं जिंकली. इतकंच नव्हे तर तिने बॉलिवूडमध्ये पदार्पण केलं. आपल्या कामामुळे चर्चेत असणारी ही अभिनेत्री तिच्या खासगी आयुष्यामुळेही कलाविश्वात चर्चेचा विषय ठरली. अमृता व तिचा पती हिमांशू मल्होत्रा यांच्यामध्ये काहीतरी बिनसलं असल्याच्या बऱ्याच चर्चा रंगतात. याबाबत आता अमृताने भाष्य केलं आहे.
प्लॅनेट मराठीच्या पटलं तर घ्या या शोमध्ये अमृताने हजेरी लावली होती. यावेळी तिला हिमांशू व तिच्या नात्याविषयी सुरू असलेल्या अफवांबाबत प्रश्न विचारण्यात आला. यावेळी अमृता म्हणाली, “आम्ही दोघं एकमेकांना फॉलो आणि अनफॉलो करत असतो. आम्हा दोघांना एकत्र राहून १८ वर्ष झाली. याची आता मला सवय झाली आहे. आधी त्याने मला अनफॉलो केलं की आमच्यामध्ये वाद व्हायचे. आताही मी त्याच्याशी भांडते. पण हे अगदीच बालिशपणासारखं आम्ही वागतो.”
“आम्ही एकमेकांना अनफॉलो केलं की आम्ही एकत्र राहतो की नाही याबाबत वर्तमानपत्रामध्ये बातम्या पाहायला मिळतात. आम्ही १८ वर्षांपासून एकत्र आहोत. सोशल मीडियाचं वेड ८ ते १० वर्षांपूर्वी आलेलं आहे. आता इतके वर्ष एकत्र राहिल्यानंतर काय फोटो पोस्ट करायचे असं होतं. पण त्यातही आम्ही लग्नाचा वाढदिवस असो वा आमचा कोणाचा वाढदिवस असो आम्ही फोटो पोस्ट करतो.”
आणखी वाचा – Photos : आदिल खानबरोबर प्रेमाची कबुली देताच राखी सावंतने दुबईमध्ये खरेदी केलं होतं महागडं घर, पाहा फोटो
कितीही अफवा असल्या तरी अमृता व हिमांशू अजूनही एकत्र आहेत हे तिने पहिल्यांदाच उघडपणे सांगितलं आहे. तसेच सतत सुरू असलेल्या अफवांना पूर्णविराम दिला आहे. शिवाय ट्रोल करणाऱ्यांनाही तिने सुनावलं आहे. ट्रोलर्सविषयी तुझं काय मत असं अमृताला या मुलाखतीमध्ये विचारण्यात आलं. तेव्हा ती म्हणाली, “तुमच्याकडे खूप वेळ आहे बाबा”. म्हणजेच अमृता ट्रोल करणाऱ्यांकडेही अगदी दुर्लक्ष करते.
