केदार शिंदे दिग्दर्शित ‘बाईपण भारी देवा’ चित्रपटाला प्रेक्षकांचा चांगला प्रतिसाद मिळताना दिसत आहे. या चित्रपटाने बॉक्स ऑफिसवर अनेक रेकॉर्ड ब्रेक केले आहेत. हा चित्रपट मराठी चित्रपटसृष्टीत एका दिवसात सर्वाधिक कमाई करणारा चित्रपट ठरला आहे. या चित्रपटाने फक्त १७ दिवसांत ५० कोटींचा टप्पा पार केला आहे. नुकतंच या चित्रपटाबद्दल अभिनेता अंकुश चौधरी आणि दीपा चौधरीचा मुलगा प्रिन्सने प्रतिक्रिया दिली.
‘बाईपण भारी देवा’ च्या संपूर्ण टीमने नुकतंच चित्रपटाच्या यशाचे जंगी सेलिब्रेशन केले. यावेळी या चित्रपटातील सर्वच कलाकारांनी चित्रपटाबद्दल भाष्य केले. यावेळी अंकुश आणि दिपाचा मुलगा प्रिन्सनेही हजेरी लावली. यावेळी त्याला ‘बाईपण भारी देवा’ चित्रपटाबद्दल विचारण्यात आले.
आणखी वाचा : बजेट फक्त ५ कोटी, कमाई मात्र दहापट; ‘बाईपण भारी देवा’चा बॉक्स ऑफिसवर धुमाकूळ, कमावले इतके कोटी
‘बाईपण भारी देवा’ चित्रपट तुला कसा वाटला? असा प्रश्न प्रिन्सला विचारण्यात आला होता. त्यावर त्याने ‘चांगला’ अशी प्रतिक्रिया दिली. त्यानंतर त्याला आईचं काम कसं वाटलं? असे विचारले. त्यावर त्याने ‘फारच मस्त चांगलं’ असे सांगितले.
दरम्यान ‘बाईपण भारी देवा’ या चित्रपटाने पहिल्याच आठवड्याच्या अखेरीस १२.५० कोटी रुपयांची कमाई केली होती. त्यानंतर दुसऱ्या आठवड्यात या चित्रपटाच्या कमाईत दुप्पटीने वाढ झाली. या चित्रपटाने दुसऱ्या आठवड्यात तब्बल २४.८५ कोटी रुपयांचा गल्ला जमवला. हा चित्रपट तिसऱ्या आठवड्यातही बॉक्स ऑफिसवर धुमाकूळ घालत आहे.
