मराठी कलाविश्वातील हरहुन्नरी ज्येष्ठ अभिनेते अशोक सराफ यांना अलीकडेच ‘महाराष्ट्र भूषण’, ‘मास्टर दीनानाथ मंगेशकर’ व मराठी नाट्य परिषदेच्या जीवनगौरव पुरस्काराने सन्मानित करण्यात आलं. त्यामुळे सध्या मनोरंजनसृष्टीतून त्यांच्यावर कौतुकाचा वर्षाव करण्यात येत आहे. नुकतेच काही लोकप्रिय मराठी कलाकार अशोक सराफ यांच्या घरी गेले होते. सुनील बर्वे, लोकेश गुप्ते, वंदना गुप्ते असे सगळे कलाकार यावेळी उपस्थित होते.
अशोक सराफ यांच्या घरी या सगळ्यांनी एकत्र मिळून सेलिब्रेशन करत एका नव्या प्रोजेक्टवर चर्चा केली. याचे काही फोटो कलाकारांनी सोशल मीडियावर शेअर केले आहे. अभिनेते सुनील बर्वे यांनी अशोक व निवेदिता सराफ यांच्यासाठी एक खास पोस्ट इन्स्टाग्रामवर शेअर केली आहे. ही खास पोस्ट अशोक सराफ यांच्या घरावरच्या नावाच्या पाटीसाठी आहे आणि या नेमप्लेटचं मराठी चित्रपटसृष्टीतील आयकॉनिक ‘अशी ही बनवाबनवी’ चित्रपटाशी खास कनेक्शन आहे. ही नेमप्लेट नेमकी कशी आहे पाहूयात…
हेही वाचा : ठरलं तर मग : मित्रासाठी काहीपण! चैतन्यचा ‘तो’ निर्णय ऐकून अर्जुनला बसला मोठा धक्का, नेमकं काय घडलं?
‘अशी ही बनवाबनवी’ हा चित्रपट २३ सप्टेंबर १९८८ रोजी प्रेक्षकांच्या भेटीला आला. या चित्रपटाने बॉक्स ऑफिसवर अफलातून कामगिरी केली होती. एवढंच नव्हे तर हा चित्रपट मराठी मनोरंजनविश्वातील सदाबहार चित्रपटांपैकी एक म्हणून ओळखला जातो. यामधील सगळे संवाद प्रेक्षकांच्या आजही लक्षात आहेत.
अशोक सराफ, लक्ष्मीकांत बेर्डे, सचिन पिळगांवकर असे मराठी कलाविश्वातील सुपरस्टार्स या चित्रपटामध्ये एकत्र झळकले होते. या चित्रपटात अशोक सराफ यांनी धनंजय माने ही भूमिका साकारली होती. ‘अशी ही बनवाबनवी’ चित्रपटातील “धनंजय माने इथेच राहतात का?” हा संवाद घराघरांत लोकप्रिय आहे. यावरूनच अशोक सराफ यांनी त्यांच्या घराच्या दारावर नावाची पाटी लावली आहे.
सुनील बर्वे यांनी शेअर केलेल्या फोटोमध्ये अशोक सराफ यांच्या दारावरची नेमप्लेट लक्ष वेधून घेते. यावर “धनंजय माने इथेच राहतात…श्री. अशोक सराफ ( द वरजिनल हास्यसम्राट )” असा मजकूर लिहिण्यात आला आहे. हा फोटो शेअर करत सुनील बर्वे यांनी “काल एकदा खात्रीच करून घेतली!! ते नक्की इथेच राहतात!” असं मजेशीर कॅप्शन दिलं आहे.
दरम्यान, ‘अशी ही बनवाबनवी’, ‘धूमधडाका’, ‘नवरा माझा नवसाचा’, ‘आम्ही सातपुते’ ते नुकताच प्रदर्शित झालेला ‘वेड’ अशा असंख्य गाजलेल्या चित्रपटांमध्ये अशोक सराफ यांनी प्रमुख भूमिका साकारल्या आहेत. मालिका असो, सिनेमा असो किंवा नाटक त्यांनी कायमच प्रेक्षकांच्या मनावर अधिराज्य गाजवलं आहे.
© IE Online Media Services (P) Ltd
