गेल्या आठवड्यात ‘बाईपण भारी देवा’, ‘सत्यप्रेम की कथा’ आणि ‘कॅरी ऑन जट्टा ३’ हे चित्रपट प्रेक्षकांच्या भेटीला आले. हे तिन्ही चित्रपट प्रेक्षकांच्या पसंतीस पडत आहेत. या तीन चित्रपटांमध्ये ‘बाईपण भारी देवा’ हा चित्रपटगृहात उत्कृष्ट कामगिरी करताना दिसत आहे. या चित्रपटाने पहिल्या वीकएण्डला किती कमाई केली त्याचा आकडाचा समोर आला आहे.
गेल्या अनेक दिवसांपासून या चित्रपटाची जोरदार चर्चा आहे. केदार शिंदे यांनी या चित्रपटाचं दिग्दर्शन केलं आहे. या चित्रपटात रोहिणी हट्टंगडी, वंदना गुप्ते, सुकन्या मोने, सुचित्रा बांदेकर, शिल्पा नवलकर आणि दीपा चौधरी महत्वपूर्ण भूमिकेत दिसत आहेत. हा चित्रपट म्हणजे सहा बहिणींची कथा आहे. या चित्रपटाला संपूर्ण महाराष्ट्रातून खूप चांगला प्रतिसाद मिळत आहे. हा चित्रपट चित्रपटगृहात कार्तिक आर्यनच्या चित्रपटाला चांगलीच टक्कर देताना दिसत आहे.
‘बाईपण भारी देवा’ या चित्रपटाला पहिल्या शो पासून प्रेक्षक गर्दी करताना दिसत आहेत. या चित्रपटाचे सर्व शो सर्वत्र हाऊसफुल सुरू आहेत. हा चित्रपट चित्रपटगृहात दणदणीत कमाई करताना दिसत आहे. ‘पिंकविला’च्या वृत्तानुसार, पहिल्या दिवशी या चित्रपटाने १ कोटींची कमाई केली, दुसऱ्या दिवशी या चित्रपटाचे कमाईमध्ये दुप्पट वाढ झाली. शनिवारी या चित्रपटाने २.१० कोटी कमावले. तर तिसऱ्या दिवशी म्हणजेच काल या चित्रपटाने २.८० कोटींचा गल्ला जमवला. तर पहिल्या वीकएण्डला या चित्रपटाने एकूण ५.९० कोटींची कमाई केली आहे.
तर आज म्हणजेच सोमवारीदेखील चित्रपटाला सर्वत्र उत्तम प्रतिसाद मिळताना दिसत आहे. याचबरोबर सोशल मीडियावरूनही प्रेक्षक या चित्रपटाचं भरभरून कौतुक करत इतरांना हा चित्रपट आवर्जून पाहण्याचं आवाहन करत आहेत.
