परदेशात चित्रीकरण करणं हे मराठी सिनेसृष्टीसाठी आता काही नवीन राहिलेलं नाही. परंतु, भारतातीलच एक असं ठिकाण जे समुद्रसपाटीपासून हजारो फूट उंच, ऑक्सिजन पातळी अगदी कमी आणि जिथे हवामान कधी बदलेल याचा नेम नाही, अशा ठिकाणी चित्रीकरण करणं हे निश्चितच आव्हानात्मक आहे आणि हे ठिकाण आहे भारताच्या ईशान्य भागातील सिक्कीम. स्नेह पोंक्षे दिग्दर्शित ‘बंजारा’ या चित्रपटाचे चित्रीकरण हे निसर्गरम्य सिक्कीममध्ये झाले आहे. त्यामुळे ‘बंजारा’ हा केवळ मराठीच नाही तर भारतीय सिनेसृष्टीतील पहिला चित्रपट आहे, ज्याचं चित्रीकरण सिक्कीममध्ये झालं आहे.
यापूर्वी ‘बंजारा’ चित्रपटाचं पोस्टर, टीझर प्रेक्षकांच्या भेटीला आलं आहे. यात सिक्कीमचं मनमोहक सौंदर्य आणि मित्रांची बाईक राईड बघून अनेकांना खूप छान वाटलं असेल. हे पडद्यावर जितकं सहज, सुंदर दिसत आहे पण, या ठिकाणी चित्रीकरण करणं, हे प्रचंड आव्हानात्मक होतं. याबाबतचा अनुभव चित्रपटाचा दिग्दर्शक स्नेह पोंक्षेने शेअर केला आहे.
दिग्दर्शक स्नेह पोंक्षे म्हणतो, ”हे एक असे चित्रीकरण स्थळ आहे, जिथे आजवर कोणत्याच चित्रपटाचं चित्रीकरण झालेले नाही. ही जागाच अशी आहे, की कोणालाही प्रेमात पाडेल. आम्ही सुमारे १४, ८०० फूट उंचीवर चित्रीकरण केलं आहे, जिथे ऑक्सिजन खूप कमी होता. आम्ही अक्षरशः ऑक्सिजन स्प्रे वापरत होतो. एकतर हवामानाचा काहीच अंदाज नाही. क्षणात उजाडलेलं असायचं, तर क्षणात पाऊस यायचा. आमचं नऊ दिवसांचं शेड्यूल होतं आणि या काळात बराच पाऊस पडला. शेड्यूल बदलू शकत नसल्याने कसंबसं शूटिंग पूर्ण केलं. सुमारे दीडशेची टीम घेऊन आम्ही तिथे गेलो होतो आणि तिथली जवळपास शंभरच्यावर लोकं होती. अशा सगळ्यांना सेटवर घेऊन आम्ही त्या अनपेक्षित हवामानात चित्रीकरण पूर्ण केले. या सगळ्यासाठी आम्हाला इंडियन आर्मीचं खूप सहकार्य लाभलं.”
मैत्री आणि आत्मशोधाचा सुंदर संदेश देणारा हा चित्रपट लवकरच प्रेक्षकांच्या भेटीला येणार आहे. वी. एस. प्रॉडक्शन्स आणि मरया प्रॉडक्शन्स सादर करत असणाऱ्या या चित्रपटाची कथा, पटकथा, लेखन स्नेह पोंक्षे यानेच केले असून या चित्रपटात शरद पोंक्षे, भरत जाधव, सुनील बर्वे, स्नेह पोंक्षे, सक्षम कुलकर्णी आणि आदित्य धनराज यांच्या प्रमुख भूमिका आहेत. तर रोहिणी विजयसिंह पटवर्धन आणि शरद पोंक्षे या चित्रपटाचे निर्माते आहेत.
