Worli Hit and Run Case Marathi Actor Post : मुंबईतल्या वरळी परिसरात दोन दिवसांपूर्वी भरधाव वेगात असलेल्या बीएमडब्ल्यू गाडीने एका महिलेला चिरडल्याची घटना घडली. वरळीतील या हिट अँड रन प्रकरणामुळे सध्या संपूर्ण मुंबई हादरुन गेली आहे. या घटनेत ४५ वर्षीय कावेरी नाखवा यांचा मृत्यू झाला असून त्यांचे पती प्रदीप नाखवा ( वयवर्ष ५० ) हे गंभीर जखमी झाले आहेत. पोलिसांच्या तपासानंतर शिवसेनेच्या शिंदे गटाचे उपनेते राजेश शाह यांचा मुलगा मिहीरचा यामध्ये सहभाग असल्याचं समोर आलं. आरोपी मिहीर शाह अपघातानंतर फरार झाला होता. पण, अखेर त्याला मुंबई पोलिसांनी शहापूर येथून अटक करण्यात आल्याचं वृत्त एएनआयने दिलं आहे. याप्रकरणी सध्या सर्व स्तरांतून प्रतिक्रिया येत आहेत. या घटनेत मृत पावलेल्या कावेरी नाखवा या मराठी कलाविश्वातील ज्येष्ठ अभिनेते जयवंत वाडकर यांच्या सख्ख्या पुतणी लागत होत्या. त्यामुळे आरोपीला फाशीची शिक्षा व्हावी अशी मागणी त्यांनी केली होती. यानंतर आता आणखी एका मराठी अभिनेत्याने या घटनेसंदर्भात आपलं मत व्यक्त केलं आहे. हेही वाचा : Worli Hit and Run Case : प्रदीप नाखवांचा हा आक्रोश पाहून तुमचंही मन हेलावून जाईल! म्हणाले, “मी बोनेटवर हात मारला, पण…” Worli (Mumbai) hit-and-run case | Mumbai Police arrest accused Mihir Shah, who was absconding.— ANI (@ANI) July 9, 2024 उत्कर्ष शिंदेची पोस्ट "फार फार तर उद्या 'सिम्बा'… 'सिंघम'…'सूर्यवंशी'सारख्या चित्रपटांची सुरुवात अशाप्रकारच्या अपघाताने होईल आणि फिल्मी न्याय फक्त त्या चित्रपटात मिळेल. सत्यात न्याय देणारे…न्याय मिळू देणार नाहीत. मराठीचा टेंभा मिरवणारे मराठी माणसाला न्याय मिळवून देतील का? आता होईल ती दुकानदारांची 'सेटलमेंट" अशी पोस्ट शेअर करत उत्कर्षने घडलेल्या घटनेबाबत संताप व्यक्त केला आहे. उत्कर्ष शिंदेची पोस्ट हेही वाचा : Worli Hit And Run Case : “आरोपीला फाशी द्या”, ‘वरळी हिट अँड रन’ प्रकरणात जयवंत वाडकर यांच्या पुतणीचा मृत्यू; म्हणाले, “सगळे पुरावे…” नेमकं काय घडलं? रविवारी ( ७ जुलै ) पहाटेच्या सुमारास वरळीतील अट्रिया मॉलजवळ ही घटना घडली. यावेळी नाखवा दाम्पत्य दुचाकीवरुन प्रवास करत होतं. ससून डॉक परिसरातून मासे विकत घेऊन ते दोघंही घरी जात होते. यादरम्यान भरधाव वेगाने आलेल्या बीएमडब्ल्यू गाडीने नाखवा यांच्या दुचाकीला धडक दिली. या भीषण अपघातामध्ये प्रदीप नाखवा बचावले परंतु, त्यांच्या पत्नी कावेरी यांचा या घटनेत मृत्यू झाला.
