केदार शिंदे दिग्दर्शित ‘बाईपण भारी देवा’ चित्रपट ३० जूनला प्रदर्शित झाला. हा चित्रपट प्रदर्शित होऊन चार आठवडे पूर्ण झाले आहेत. या चित्रपटाने आतापर्यंत बॉक्स ऑफिसवर ६० कोटींहून अधिकचा गल्ला जमवला आहे. तसेच या चित्रपटाने अनेक रेकॉर्डही ब्रेक केले आहेत. नुकतंच या चित्रपटाचे एका बॉलिवूड अभिनेत्रीने कौतुक केले आहे.
‘बाईपण भारी देवा’ या चित्रपटात सहा बहिणींची कथा दाखवली आहे. यात रोहिणी हट्टंगडी, वंदना गुप्ते, सुकन्या मोने, सुचित्रा बांदेकर, शिल्पा नवलकर आणि दीपा चौधरी महत्वपूर्ण भूमिकेत दिसत आहेत. हा चित्रपट चित्रपटगृहात दणदणीत कामगिरी करत आहे. या चित्रपटाची कथा, दिग्दर्शन, सर्व कलाकारांचा अभिनय याबरोबरच या चित्रपटातील गाण्यांना प्रेक्षकांनी अक्षरशः डोक्यावर घेतलं आहे.
आणखी वाचा : ‘बाईपण भारी देवा’ नाकारणाऱ्या निर्मात्याने केदार शिंदेना केला मेसेज, म्हणाला “माझी बस चुकली, पण…”
नुकतंच अभिनेत्री मृणाल ठाकूरने इन्स्टाग्राम स्टोरीवर एक पोस्ट शेअर केली आहे. यावर तिने ‘बाईपण भारी देवा’ चित्रपटाचे पोस्टर शेअर केले आहे. त्याबरोबर तिने या चित्रपटाचे कौतुकही केले आहे.
“बाईपण भारी देवा, कसला कमाल चित्रपट आहे. चित्रपटाच्या संपूर्ण टीमचे अभिनंदन. अनेकजण म्हणतात, की हल्ली चांगले चित्रपट कुठे बनतात? त्यांना सांगावेसे वाटते बनतात बॉस!! गेल्या ५ आठवड्यांपासून हा चित्रपट चित्रपटगृहात हाऊसफुल सुरु आहे. नुकतंच हैदराबादमध्ये हा चित्रपट पाहिला, तो देखील हाऊसफुल शो होता. खरंच खूप खूप खूप अभिमान वाटतो. नक्की बघा”, असे मृणालने म्हटले आहे.
“‘बाईपण भारी देवा’ चित्रपटाने हैदराबादमधील प्रेक्षकांची मन जिंकली आहेत. क्या बात है”, अशीही पोस्ट तिने केली आहे. मृणालची ही पोस्ट केदार शिंदेंनी शेअर करत तिचे आभार मानले आहेत.
दरम्यान या चित्रपटाने २४ दिवसात ६५.६१ कोटींचा गल्ला जमवला आहे. यामुळे रितेश देशमुख आणि जिनिलीया देशमुखच्या ‘वेड’ चित्रपटाचा रेकॉर्ड मोडला आहे. ‘वेड’ चित्रपटाने २४ दिवसात ५४.४० कोटींची कमाई केली होती.
