लोकप्रिय अभिनेते, लेखक, दिग्दर्शक दिग्पाल लांजेकर सध्या ‘संत ज्ञानेश्वरांची मुक्ताई’ या त्यांच्या आगामी चित्रपटामुळे चर्चेत आहेत. अलीकडेच या चित्रपटाचा टीझर प्रदर्शित झाला; या सुंदर टीझरने प्रेक्षकांनी मनं जिंकली. १८ एप्रिलला ‘संत ज्ञानेश्वरांची मुक्ताई’ चित्रपट प्रदर्शित होणार आहे. याच चित्रपटाच्या निमित्ताने दिग्पाल लांजेकर यांनी उत्तर प्रदेशचे मुख्यमंत्री योगी आदित्यनाथ यांची भेट घेतली. यासंदर्भात नुकतीच दिग्पाल लांजेकरांनी पोस्ट शेअर केली असून त्यांनी या ग्रेटभेटीचा अनुभव सांगितला आहे.
उत्तर प्रदेशचे मुख्यमंत्री योगी आदित्यनाथ यांच्या भेटीचे फोटो शेअर करत दिग्पाल लांजेकर यांनी लिहिलं, “३० मार्च २०२५, आळंदीच्या संत ज्ञानेश्वर महाराज समाधी मंदिराचे प्रमुख विश्वस्त योगी निरंजन नाथ यांचा दूरध्वनी आला. योगींना भेटायचं आहे. म्हटलं “सांगा कुठे येऊ?” ते म्हणाले “योगी म्हणजे मी नव्हे, योगी आदित्यनाथ, उत्तर प्रदेशचे मुख्यमंत्री.” मी तातडीनं होकार भरला आणि अजय दादा (पुरकर)लाबरोबर घेऊन लखनऊला पोहोचलो. ३१ मार्चला सकाळी ११.१५ची भेटीची वेळ मिळाली होती आणि केवळ ५ मिनिटांसाठी मिळाली होती. अनेक विचार डोक्यात घेऊन लखनऊच्या मुख्यमंत्री आवासात पोहोचलो आणि गेल्या गेल्या कळलं की दिवसाभरातली आमचीच पहिली भेट आहे.”
पुढे दिग्पाल लांजेकरांनी लिहिलं की, काही काळ निरंजन नाथांशी अन्य विषयावर बोलणं झाल्यावर माझ्याकडे योगी आदित्यनाथांनी सहज हसून पाहिलं आणि चौकशी केली. ज्ञानोबारायांचं स्मरण करून त्यांना “संत ज्ञानेश्वरांची मुक्ताई” सिनेमाबद्दल सांगायला सुरुवात केली. पोस्टर पुढे करत म्हणालो “आता महाराष्ट्राच्या संत परंपरेवर आधारित सिनेमा बनवत आहे. संत ज्ञानेश्वरांची …इतक्यात समोरून ते उदगारले “मुक्ताई !… अर्थात उनकी छोटी मातृतुल्य बहन!” मी आणि अजय दादाने विस्मयाने एकामेकांकडे पाहिलं. तोवर “आदिनाथ गुरु सकळ सिद्धांचा…” ही ओवी त्यांनी आम्हाला ऐकवली आणि म्हणाले, “इतिहासाशी प्रतारणा न करता हे सगळं दाखवायची इच्छा आणि प्रामाणिकपणा पाहिजे” त्यावर जरा धीर करून मी म्हटलं की, एक कच्चा ट्रेलर आम्ही बरोबर आणला आहे. अनुमती असेल तर दाखवतो. त्यांनी क्षणाचाही विलंब न करता दाखवा म्हटलं.
“अतिशय श्रद्धेनं त्यांनी ट्रेलर पूर्ण पाहिला. चित्रपटातील ज्ञानेश्वर माऊली मुक्ताबाईंना कुंडलिनी अभ्यास शिकवतात, मुक्ताई मातेचं अध्यात्मातील अधिकार दाखवणारे प्रसंग, नाथसंप्रदायाचा इतिहास अशा प्रसंगांवर दाद दिली. त्यानंतर ज्या नाथ संप्रदायाचे ते पाईक आहेत , तो नाथ संप्रदाय आणि वारकरी संप्रदाय यांचा अलौकिक संबंध, त्या सगळ्या क्रांतीत या चारही भावंडांचं योगदान यावर भरभरून बोलले. समोर बसलेली व्यक्ती एक अभ्यासू साधक आहे, हे क्षणाक्षणाला जाणवत होतं. भेटी अंती आवर्जून म्हणाले, “यह निर्मिती तो अत्यन्त सुंदर हुई है…इसी तरह से धर्म और भारतीय तत्वज्ञान के प्रति प्रामाणिकता से कार्य करते रहो. इस प्रकार संतों के कार्य दिखाने वाली और भी फिल्मे बनाइये। आपका कल्याण हो।” परतताना मनात केवळ हेच येत होत “सगळं माऊलींचं आहे, मुक्ताईचं आहे… माझे केवळ पाईकपण” ।।राम कृष्ण हरी।।,” असं दिग्पाल लांजेकर यांनी लिहिलं आहे.
दरम्यान, दिग्पाल लांजेकर लिखित-दिग्दर्शित ‘संत ज्ञानेश्वरांची मुक्ताई’ चित्रपटात संत ज्ञानेश्वरांच्या भूमिकेत अभिनेता तेजस बर्वे, संत मुक्ताईची भूमिकेत अभिनेत्री नेहा नाईक, संत निवृत्तीनाथ यांच्या भूमिकेत अक्षय केळकर आणि संत सोपानकाकांच्या भूमिकेत अभिनेता सूरज पारसनीस झळकणार आहे. याशिवाय चित्रपटात समीर धर्माधिकारी, मृणाल कुलकर्णी, अजय पुरकर, मनोजी जोशी, योगेश सोमण, स्मिता शेवाळे, सचिन देशपांडे, अभिजीत श्वेतचंद्र असे अनेक कलाकार मंडळी महत्त्वाच्या भूमिकेत पाहायला मिळणार आहेत.