मराठमोळा अभिनेता गश्मीर महाजनी वडिलांच्या निधनानंतर मागचे काही दिवस मोठ्या पडद्यावरून दूर होता, पण आता तो लवकरच नव्या भूमिकेतून प्रेक्षकांच्या भेटीला येणार आहे. त्याने स्वतःच याबद्दल माहिती दिली आहे. तो एका ऐतिहासिक भूमिकेत पाहायला मिळणार आहे. पण तो कोणती भूमिका साकरणार आहे, याबद्दल त्याने अद्याप काहीच सांगितलेलं नाही.
“दोघांचं लव्ह मॅरेज होतं, पण दुर्दैवाने…”, पालकांच्या लग्नाबद्दल लेक गश्मीर महाजनीचा खुलासा
गश्मीरने इन्स्टाग्रामवर एक व्हिडीओ शेअर करत चाहत्यांना ही माहिती दिली आहे. “पुन्हा एकदा तोच प्रवास… लवकरच …” असं कॅप्शन देत गश्मीरने हा व्हिडीओ शेअर केला आहे. हा व्हिडीओ त्याच्या वेगवेगळ्या फोटोंचा कोलाज करून बनविण्यात आला आहे. गश्मीरने व्हिडीओ शेअर केलाय, पण चित्रपटाचं नाव काय असेल किंवा तो कोणती भूमिका साकारणार याबद्दल माहिती दिलेली नाही.
गश्मीरने ‘सरसेनापती हंबीरराव’ या चित्रपटात छत्रपती शिवाजी महाराजांची भूमिका साकारली होती. त्यानंतर आता पुन्हा एकदा तो ऐतिहासिक भूमिकेत दिसणार आहे. ही भूमिका कोणती असेल, याबाबत चाहत्यांमध्ये उत्सुकता आहे. गश्मीरने हा व्हिडीओ शेअर केल्यानंतर इन्स्टाग्रामवर चाहत्यांच्या काही प्रश्नांची उत्तरं दिली. यावेळी चाहत्यांनी त्याला शिवाजी महाराजांची भूमिका साकारणार आहेस का? की त्यांच्या मावळ्यांच्या भूमिकेत दिसशील असं विचारलं.
चाहत्याच्या प्रश्नाला उत्तर देताना गश्मीर म्हणाला, “त्या काळातील मोठा साहसपट करत आहे एवढंच. बाकी माहिती योग्य वेळी देईन. आधी कधीच झाला नाही, असा हा चित्रपट असेल आणि त्याची अधिकृत घोषणा लवकरच केली जाईल,” असं गश्मीरने सांगितलं.
