Swanand Tendulkar and Gautami Deshpande Wedding : मराठी कलाविश्वात सध्या लगीनघाई सुरू असल्याचं पाहायला मिळत आहे. नुकताच गौतमी देशपांडे आणि स्वानंद तेंडुलकर यांचा विवाहसोहळा पुण्यात पार पडला. या दोघांच्या लग्नाला मराठी सिनेसृष्टीतील कलाकार व दोघांच्या जवळच्या मित्र-मैत्रिणींनी हजेरी लावली होती. दोघांच्या लग्नसोहळ्याचे असंख्य फोटो सध्या सोशल मीडियावर व्हायरल होत आहेत.
गेल्या अनेक दिवसांपासून गौतमीच्या लग्नासाठी देशपांडेंच्या घरी जोरदार तयारी सुरू होती. गौतमी ही लोकप्रिय अभिनेत्री मृण्मयी देशपांडेची धाकटी बहीण आहे. त्यामुळे लाडक्या बहिणीच्या लग्नातील प्रत्येक कार्यक्रमासाठी मृण्मयीने विशेष तयारी केली होती. हळदी आणि संगीत सोहळ्यात अभिनेत्रीने खास डान्स देखील केला होता.
गौतमी-स्वानंदच्या लग्नातील बरेच फोटो आता व्हायरल होत आहेत. यातील एका फोटोमध्ये मृण्मयी स्वानंदचा कान पिळत असल्याचं पाहायला मिळत आहे. मृण्मयीप्रमाणे गौतमीचे इतर भाऊ सुद्धा या कानपिळीच्या विधीला उपस्थित होते.
हेही वाचा : ‘अ‍ॅनिमल पार्क’मध्ये उपेंद्र लिमयेंची भूमिका असेल का? खुलासा करत म्हणाले, “माझं संदीपशी परवाच…”
दरम्यान, मराठी कलाविश्वात मृण्मयी आणि गौतमी देशपांडे या बहिणींची जोडी प्रचंड लोकप्रिय आहे. चित्रपटसृष्टीत देशपांडे बहिणींची नेहमीच चर्चा असते. मालिका, चित्रपट, सीरिज या विविध माध्यमांतून या बहिणी प्रेक्षकांचं मनोरंजन करतात. या दोघीही सोशल मीडियावर प्रचंड सक्रिय असतात. एकमेकींना त्रास देणारे, कौतुक करणारे असे अनेक व्हिडीओ त्या इन्स्टाग्रामवर शेअर करतात.
