अभिनेता जितेंद्र जोशी त्याच्या दमदार अभिनय कौशल्यामुळे कायमच चर्चेत असतो. मराठीसह हिंदी चित्रपटसृष्टीत अभिनेत्याने स्वत:ची एक वेगळी ओळख निर्माण केली आहे. जितेंद्र जोशी सोशल मीडियावर प्रचंड सक्रिय असतो. त्याच्या वैयक्तिक आयुष्यातील अनेक अनुभव तो सोशल मीडियाच्या माध्यमातून चाहत्यांबरोबर शेअर करत असतो. अभिनेत्याला नुकताच विमानप्रवास करताना संतापजनक अनुभव आला आहे. याबद्दलची पोस्ट त्याने इन्स्टाग्रामवर शेअर केली आहे.
हेही वाचा : शाहरुख खान व्हाया राहुल; एक-दोन नव्हे तर तब्बल ‘इतक्या’ चित्रपटांमध्ये किंग खानचं नाव होतं राहुल!
जितेंद्र जोशीने सोशल मीडियावर फोटो शेअर करत एका नामांकित विमानकंपनीवर टीका केली आहे. प्रवासादरम्यान त्याला नेमका काय अनुभव आला याचा खुलासा अभिनेत्याने या पोस्टद्वारे केला आहे. एका नामांकित विमान कंपनीचा उल्लेख करत जितेंद्र लिहितो, “एकदम वाईट! तुम्ही प्रतिष्ठा अन् आदर सगळंच गमावलं. तुमची विमानं तब्बल दीड तास उशिराने उड्डाण करत आहेत. याबद्दल तुम्ही प्रवाशांची साधी माफीदेखील मागितलेली नाही.”
जितेंद्र जोशीप्रमाणे अलीकडे बरेच मराठी कलाकार सोशल मीडियावर व्यक्त होताना दिसतात. यापूर्वी ‘पोश्टर बॉईज’ आणि ‘कळत नकळत’ फेम अभिनेता अनिकेत विश्वासरावला सुद्धा विमानप्रवासादरम्यान असाच काहीसा अनुभव आला होता. त्याने देखील नामांकित विमान कंपन्यांना टॅग करत त्याचा संतापजनक अनुभव सोशल मीडियावर शेअर केला होता.
हेही वाचा : शाहरुख खान : बॉलीवूडला ‘दिवाना’ बनवणाऱ्या ‘बादशहा’च्या गाण्यांची गोष्ट
दरम्यान, जितेंद्र जोशीच्या कामाबद्दल सांगायचं झालं तर, राष्ट्रीय पुरस्कार विजेत्या ‘गोदावरी’ चित्रपटात त्याने निशिकांत देशमुख ही व्यक्तिरेखा साकारली होती. याशिवाय लवकरच तो ‘नाळ २’ चित्रपटात झळकणार आहे.
