Kartiki Gaikwad Brother Singer Kaustubh Gaikwad : मराठी कलाविश्वात सध्या लगीनघाई सुरू असल्याचं पाहायला मिळत आहे. गेल्या काही दिवसांत अनेक कलाकार लग्नबंधनात अडकले. रेश्मा शिंदे, अभिषेक गावकर, शाल्व किंजवडेकर, किरण गायकवाड, हेमल इंगळे या सगळ्या कलाकारांचे लग्नसोहळे थाटामाटात पार पडले. तर, येत्या काही दिवसांत शिवानी सोनार व अंबर गणपुळे हे विवाहबंधनात अडकणार आहेत. अशातच आता आणखी एका मराठी गायकाने आपल्या चाहत्यांना आनंदाची बातमी दिली आहे.
‘सारेगमप लिटिल चॅम्प्स’ या शोमधून कार्तिकी गायकवाड घराघरांत लोकप्रिय झाली. ती पहिल्या पर्वाची विजेती ठरली होती. कार्तिकीला आपल्या घरातच गायनाचा वारसा लाभलेला आहे. तिचा भाऊ कौस्तुभ गायकवाड सुद्धा मराठी इंडस्ट्रीतील लोकप्रिय गायक म्हणून ओळखला जातो. काही चित्रपटांसाठी त्याने पार्श्वगायन केलेलं आहे. याशिवाय कार्तिकी, तिचे वडील व भाऊ मिळून गाण्यांचे अनेक शोज देखील करतात. सध्या कौस्तुभ वैयक्तिक आयुष्यातील एका खास गोष्टीमुळे चर्चेत आला आहे.
कौस्तुभ गायकवाडचं लग्न ठरलेलं आहे. होणाऱ्या पत्नीसह फोटो शेअर करत गायकाने ही आनंदाची बातमी आपल्या चाहत्यांना दिली आहे. या जोडप्याचा कुंकुम तिलक कार्यक्रम नुकताच पार पडला असून आता लवकरच कौस्तुभ विवाहबंधनात अडकणार आहे.
कौस्तुभ पोस्ट शेअर करत लिहितो, “Officially engaged! Yes to forever” गायकावर सध्या मराठी कलाविश्वातून शुभेच्छांचा वर्षाव करण्यात येत आहे. याशिवाय कार्तिकी गायकवाडने सुद्धा कौस्तुभसाठी खास पोस्ट शेअर केली आहे.
लाडक्या भावासाठी पोस्ट शेअर करत कार्तिकी लिहिते, “खूप खूप अभिनंदन कौस्तुभ दादा आणि काव्या” दरम्यान, गायकाच्या कामाबद्दल सांगायचं झालं, तर त्याने २०१७ मध्ये प्रदर्शित झालेल्या ‘बॉईज’ चित्रपटातलं ‘लग्नाळू’ हे गाणं गायलं आहे. हे गाणं सोशल मीडियावर प्रचंड गाजलं. आजही प्रत्येक समारंभात हे गाणं वाजवलं जातं. याशिवाय कौस्तुभने अनेक अभंग देखील गायले आहेत.
