कोणताही चित्रपट हा कथा, अभिनय आणि दिग्दर्शनावर अवलंबून असतो. या तिन्ही गोष्टींची सांगड उत्तमरित्या झाली की चित्रपट बॉक्स ऑफिसवर ब्लॉकबस्टर ठरतो. असाच मराठीतला ब्लॉकबस्टर चित्रपट म्हणजे ‘बाईपण भारी देवा’. गेल्या वर्षी केदार शिंदे दिग्दर्शित ‘बाईपण भारी देवा’ चित्रपटाने बॉक्स ऑफिसवर अक्षरशः धुमाकूळ घातला. सहा बहिणींच्या जीवनावर आधारित असलेल्या या चित्रपटाची कथा प्रेक्षकांना चांगलीच भावली. ‘बाईपण भारी देवा’ चित्रपटाला महिला वर्गाचा भरघोस प्रतिसाद पाहायला मिळाला. ५० दिवसांत या चित्रपटाने जगभरात ९० कोटींहून अधिक कमाई केली. असा हा ब्लॉकबस्टर चित्रपट पुन्हा एकदा प्रदर्शित होतं आहे. मराठी सिनेसृष्टीतील हा पहिलाच चित्रपट, जो पुन्हा चित्रपटगृहात प्रदर्शित होतं आहे.
२०२३ मधील ‘बाईपण भारी देवा’ चित्रपटाने पहिल्या आठवड्यातच १२.५ कोटींचा गल्ला जमवला होता. इतकंच नाही तर प्रदर्शनानंतर दुसऱ्या रविवारी एका दिवसांत ६.१० कोटींची कमाई करणारा हा पहिला मराठी चित्रपट ठरला होता. ‘बाईपण भारी देवा’चं भारतातील एकूण कलेक्शन हे तब्बल ७६.५ कोटींचं होतं, तर सगळ्यात जास्त कमाई करणारा हा दुसरा मराठी चित्रपट ठरला आहे. प्रदर्शनानंतर ‘बाईपण भारी देवा’ने नवनवीन रेकॉर्ड आपल्या नावावर नोंदवले आहेतच त्यात अजून एक भर म्हणजे मराठी सिनेसृष्टीत पुन्हा प्रदर्शित होणारा सध्याच्या काळातील हा पहिलाच मराठी चित्रपट आहे.
‘बाईपण भारी देवा’ प्रदर्शित होऊन आता अनेक दिवस लोटले तरी देखील प्रेक्षकांमध्ये या कलाकृती विषयीचा उत्साह तसूभरही कमी झालेला दिसत नाही. अजूनही चित्रपटगृहामध्ये चित्रपटाचा आनंद घेण्यासाठी अनेकजण उत्सुक दिसत आहेत. आणि यातील अजून एक वैशिष्ट्यपूर्ण गोष्ट म्हणजे आज प्रदर्शित होत असलेल्या ‘छावा’ या चित्रपटाबरोबर ‘बाईपण भारी देवा’चा ट्रेलर दिसणार आहे. म्हणूनच आज निर्मात्यांनी आपल्या सोशल मीडियावर चित्रपट पुनः प्रदर्शित करणार असल्याची घोषणा केली आहे.
दिग्दर्शक केदार शिंदे म्हणाले की, “‘बाईपण भारी देवा’ हा नेहमीच माझ्यासाठी एक खास चित्रपट आहे. मायबाप प्रेक्षकांनी आमच्या संपूर्ण टीमवर केलेला प्रेमाचा वर्षाव, आमच्या कष्टाला दिलेली दाद, तो अनुभव खूपच स्पेशल आहे. जिओ स्टुडिओजच्या सहयोगाने आता पुनः तो उत्सव सिनेमागृहांत अनुभवता येणार आहे. महिला दिनाच्या निमित्त पुन्हा प्रेक्षक आवर्जून सिनेमागृहांत आपल्या सख्यांना घेऊन जातील. ज्यांनी आधी चित्रपट नाही पाहिलाय ते नवीन प्रेक्षक ही मनोरंजनाच्या या उत्सवात सामिल होतील अशी मला खात्री आहे”.
जिओ स्टुडिओज प्रस्तुत, माधुरी भोसले तसेच ज्योती देशपांडे आणि जिओ स्टुडिओज निर्मित, बेला शिंदे-अजित भुरे सह-निर्मित, रोहिणी हट्टंगडी,वंदना गुप्ते, सुचित्रा बांदेकर, शिल्पा नवलकर, दीपा परब चौधरी, आणि सुकन्या कुलकर्णी मोने अभिनीत, साई – पियूष द्वारे संगीतबद्ध केलेले संगीत, वैशाली नाईक द्वारे लिखित आणि केदार शिंदे दिग्दर्शित ‘बाईपण भारी देवा’ ७ मार्च २०२५ पासून चित्रपटगृहात पुनःप्रदर्शित होण्यास सज्ज झाला आहे.
