मराठी मनोरंजनसृष्टीतील नेहमीच चर्चेत असणाऱ्या अभिनेत्यांपैकी एक अभिनेते म्हणजे किरण माने. त्यांना ‘बिग बॉस मराठी-४’ने वेगळी ओळख दिली. या कार्यक्रमामुळे त्यांचा चाहतावर्ग प्रचंड वाढला. किरण मानेही सोशल मीडियावर सक्रिय राहून त्यांच्या चाहत्यांच्या संपर्कात असतात. ते नेहमीच त्यांना आवडलेल्या किंवा खटकणाऱ्या गोष्टींबद्दल सोशल मीडियावरून व्यक्त होत असतात. आता त्यांनी केलेली एक पोस्ट खूप चर्चेत आली आहे.
‘तेंडल्या’ हा चित्रपट गेल्या आठवड्यात प्रदर्शित झाला. किरण माने यांनी हा चित्रपट पाहिला आणि ते या चित्रपटाच्या अक्षरशः प्रेमात पडले. त्यांना हा चित्रपट खूप आवडला. या चित्रपटाची कथा, चित्रपटाचे दिग्दर्शन, सर्व कलाकारांचा अभिनय याचे त्यांनी भरभरून कौतुक केले. आता या चित्रपटातील एका कलाकारासाठी त्यांनी खास पोस्ट लिहिली आहे. हा अभिनेता म्हणजे फिरोज शेख.
किरण माने यांनी फिरोजबरोबरचा एक फोटो शेअर करीत लिहिले, “…’तेंडल्या’ बघून आल्यानंतरबी मनात घर करून राहतो, तो त्यातला गजा… गजानन ! पैज लावून सांगतो, सिनेमा बघताना माझ्या पिढीतला प्रत्येक जण ‘गजा’ झाल्याशिवाय राहणार नाय. लहानपणी आपण बघितलेली छोटी छोटी, पण त्या काळात डोंगराएवढी वाटणारी स्वप्नं… ती पूर्ण करण्यासाठी रात्रंदिवस घेतलेला ध्यास… लागलेलं वेड… त्यासाठी झालेला त्रास… वेदना… आणि स्वप्नपूर्तीनंतरचा आनंद. हे सगळं-सगळं आठवतं !”
पुढे ते म्हणाले, “फिरोज शेख हा अभिनेता गजा अक्षरश: जगलाय… छोट्या-छोट्या बारकाव्यांनिशी आपल्यासमोर जिवंत केलाय… अलीकडच्या काळात मराठीत एवढे पिच्चर येताहेत, पण अभिनयाच्या बाबतीत मन मोहून टाकेल, असा अभिनय नाही बघायला मिळाला… उलट चांगल्या भूमिकांची माती झालेली बघताना घुसमट व्हायची… त्या त्रासातनं इस्लामपूरच्या या पठ्ठ्यानं सुटका केली. लै लै लै समाधान वाटलं. किती तरी दिवसांनी पडद्यावर एक अस्सलपणे, मनापासून, अभ्यासून साकारलेली भूमिका पाहायला मिळाली. जीव थंडगार झाला.”
शेवटी त्यांनी लिहिलं, “फिरोज, भावा… पिच्चर संपल्यावर तुला शोधत आलो. तुला घट्ट मिठी मारली. तुझं मनभरून कौतुक केलं. तू बी नंतर मला बोलतं करून तुझ्या मोबाईलमधी माझ्या भावना टिपून ठेवल्यास. यापूर्वी तू माझा फॅन होतास, पण आता मी तुझा जबरा फॅन झालोय. अजूनबी तुझा ‘गजा’ पिच्छा सोडत नाय. अजून खूप कौतुक करायचं राहून गेलंय. लै मोठ्ठा हो भावा… तुझी सगळी स्वप्नं साकार होऊ देत.” आता त्यांची ही पोस्ट खूप चर्चेत आली असून यावर कमेंट करीत त्यांचे चाहते विविध प्रतिक्रिया देत आहेत.
