Maharashtra Election 2024 : राज्यभरात विधानसभा निवडणुकीसाठी मतदानाला सुरुवात झाली आहे. सकाळी ७ वाजल्यापासून ते संध्याकाळी ६ वाजेपर्यंत मतदान प्रक्रिया सुरू असणार आहे. राज्यातील २८८ विधानसभेच्या जागांसाठी मतदान होतं आहे. महायुती, महाविकास आघाडी या दोन युत्यांसह अनेक पक्ष विधानसभा निवडणुकीच्या मैदानात आहेत. या अनेक पक्षातील एकूण ४ हजार १३६ उमेदवारांचं भवितव्य आज मतपेटीत बंद होणार आहे. पुढीच पाच वर्षांसाठी सत्तेच्या चाव्या मतदार कोणाच्या हाती देणार हे २३ नोव्हेंबरला स्पष्ट होणार आहे.
मराठीसह हिंदी सिनेसृष्टीतील कलाकार आपल्या मतदानाचा हक्क बजावताना दिसत आहेत. त्याचे फोटो, व्हिडीओ व्हायरल झाले आहेत. सर्व कलाकार मतदान केल्यानंतर इतरांना मतदान करण्यासाठी आवाहन करत आहेत.
हेही वाचा – AR Rahman Divorce : २९ वर्षांचा संसार मोडला; ए. आर. रेहमान व सायरा बानू होणार विभक्त, जारी केलं निवेदन
अभिनेत्री सोनाली कुलकर्णी, आर्या आंबेकर, हेमंत ढोमे, रवी जाधव, सायली संजीव, मंदार चांदवडकर, तेजस्विनी पंडित, सुनील बर्वे, अभिजीत केळकर अशा अनेक मराठी कलाकारांनी मतदानाचं कर्तव्य पार पडलं आहे. यासंदर्भात मराठी कलाकारांनी सोशल मीडियावर पोस्ट शेअर केल्या आहेत.
अभिनेत्री सोनाली कुलकर्णीने आपल्या कुटुंबासह मतदान केलं. याचे फोटो शेअर करत तिने एक चारोळी केली. “करा आज योग्य selection…Today is the day of election…समाजात हवं असेल जर perfection…तर करू नका या संधी चं rejection”, अशी चारोळी सोनालीने केली.
लोकप्रिय अभिनेता, दिग्दर्शक, लेखक हेमंत ढोमेने मतदान केल्यानंतर खास पोस्ट शेअर केली आहे. त्याने शाईचा बोट दाखवतानाचा फोटो शेअर करून लिहिलं आहे, “माझं मत…ऐक्यासाठी… विकासासाठी… भयमुक्त सुरक्षित वातावरासाठी! माझं मत शेतकऱ्यांसाठी… दुर्बल घटकांसाठी! माझं मत जातीय सलोख्यासाठी… महाराष्ट्रधर्मा साठी! शिव शाहू फुले आंबेडकरांच्या पुरोगामी महाराष्ट्रासाठी!”
अभिनेत्री तेजस्विनी पंडितने मतदानाचा हक्क बजावला आहे. तिने फोटो शेअर करत लिहिलं की, मी मतदान केलं. तुम्ही?…लक्षात ठेवा, बोटं उगारायचा अधिकार हा बोटावर शाई लावल्यावरच मिळतो. आज मतदानाचा हक्क प्राधान्याने आणि जबाबदारीने बजावावा. तसंच अभिनेते सुनील बर्वे यांनी आपल्या कुटुंबासह मतदान केलं आहे. त्यांनी फोटो शेअर करत लिहिलं, “आम्ही आमचं कर्तव्य पार पाडलं. आता पुढील पाच वर्ष, आपण फसवले गेलो, ही भावना मनात न येता, सुखा-समाधानाची जावोत हीच राज्यकर्त्यांकडून अपेक्षा.”
दरम्यान, बॉलीवूडच्या कलाकारांनी देखील आपला मतदानाचा हक्क बजावला आहे. अभिनेता अक्षय कुमार, फरहान अख्तर, तमन्ना भाटिया, राजकुमार राव, रितेश देशमुख, सोनू सूद यांनी मतदान केलं आहे. याचे व्हिडीओ सध्या सोशल मीडियावर व्हायरल झाले आहेत.
© IE Online Media Services (P) Ltd