‘महाराष्ट्राची हास्यजत्रा’ या कार्यक्रमाद्वारे अनेक नवोदित कलाकार प्रकाशझोतात आले. अभिनेता निखिल बनेलाही या कार्यक्रमामुळे घराघरांत एका वेगळी ओळख मिळाली. लवकरच हा विनोदवीर बहुचर्चित ‘बॉईज ४’ चित्रपटातून मोठ्या पडद्यावर पदार्पण करणार आहे. ‘बॉईज ४’मध्ये निखिलच्या साथीला गौरव मोरेदेखील महत्त्वाची भूमिका साकारत आहे.
हेही वाचा : ‘ठरलं तर मग’ फेम जुई गडकरीच्या आईला पाहिलंत का? अभिनेत्रीने शेअर केला खास फोटो
‘बॉईज ४’ या चित्रपटाचा ट्रेलर लॉन्च सोहळा नुकताच संपन्न झाला. यावेळी निखिलने गौरवने त्याला चित्रपटाच्या शूटिंगदरम्यान कशी मदत केली याविषयी सांगितलं. निखिल बने म्हणाला, “गौरव आणि माझं हास्यजत्रेत एक बॉण्डिंग झालंच आहे पण, आता चित्रपटात सुद्धा आमचं कमाल बॉण्डिंग जमलं. पहिलाच सिनेमा असल्याने मला सुरूवातीला दडपण होतं परंतु, या सगळ्यात मला गौरवने खूप सांभाळून घेतलं.”
“गौरव मला नेहमी सांगायचा तुझा पहिला चित्रपट आहे मला कळतंय…तुला भिती आहे, तू दडपणाखाली आहेस पण, तू अजिबात टेन्शन नको घेऊस काही वाटलं तरी मी आहे. आपण एकत्र रिहर्सल करूया. आम्ही दोघंही वर्कशॉप किंवा शूटिंग संपवून पुन्हा हॉटेलला गेल्यावर प्रत्येक सीन एकत्र वाचायचो. पहिलाच चित्रपट असल्याने मोठी जबाबदारी होती. शेवटी सीन चांगलं होणं माझ्यासाठी महत्त्वाचं होतं.” असं निखिलने सांगितलं.
निखिल पुढे म्हणाला, “गौरवने सांगितल्याप्रमाणे आम्ही सीन एकत्र वाचले, मेहनत घेतली आणि बॉण्डिंग खरंच खूप भारी आहे. यापूर्वी गौरवने बऱ्याच चित्रपटांमध्ये काम केलेलं असल्याने त्याला अनेक गोष्टी माहिती होत्या.” दरम्यान, बहुचर्चित बॉईज ४ चित्रपट येत्या २० ऑक्टोबरला प्रेक्षकांच्या भेटीला येणार आहे.
