“ड्रग डीलरच्या भूमिकेमुळे राहण्यासाठी जागा मिळाली नाही”, मराठी अभिनेते म्हणाले, “दोन रात्री चाळीबाहेर…”

पुण्याहून मुंबईत आल्यानंतर…

अशोक शिंदे यांनी नुकतीच लोकशाही मराठी फ्रेंडलीला मुलाखत दिली. या मुलाखतीत त्यांनी अनेक चित्रपट व मालिकांच्या आठवणी सांगितल्या. तसेच एका भूमिकेमुळे त्यांना राहण्यास जागा मिळाली नव्हती, असा खुलासादेखील केला आहे. अशोक शिंदे म्हणाले, “मी मुंबईत नवीन आलो होतो, तेव्हा दादरला पेइंग गेस्ट म्हणून राहायचो. त्यावेळी माझी ‘बंदिनी’ ही मालिका चालू होती. माझा एक असा एक रेकॉर्ड झाला होता की दुपारी दोनला टीव्ही सुरू झाला की बंदिनी, दामिनी, घरकुल, चांदनी मी तुझी, तिसरा डोळा, इन्स्पेक्टर अशा प्रत्येक मालिकेत मी असायचो. म्हणजे दुपारी दोन ते संध्याकाळी साडे सात मी प्रेक्षकांना दिसायचो. आणि तेव्हा असं असायचं की स्वत:चेच कपडे मालिकेत भूमिका साकारताना वापरायचे. त्यावेळेला ती सिस्टमच अशी होती की कपडे तुमचे असायचे. पुण्याहून मुंबईत आल्यानंतर पेइंग गेस्ट म्हणून राहायला गेलो, तिथे राहण्यासाठी जागा मिळाली, सगळं झालं.

“महिन्याभराने मी त्याच ठिकाणी पुन्हा राहायला गेलो. तर तिथल्या ज्या प्रमुख केअरटेकर आजी होत्या त्या मला म्हणाल्या की अशोक तू आलास बरं झालं.पण, एक वाईट गोष्ट झाली. आमच्याकडे जे जुने पेइंग गेस्ट होते ना ते वाढले तर त्यांना आम्हाला नाही म्हणता येत नाही. आमच्याकडे जागा नाहीये. त्यानंतर त्या आजी आत गेल्या. आता कुठे जाऊ हा मला प्रश्न पडला होता. त्या आजी आत गेल्यानंतर दुसऱ्या खोलीतून त्यांचा मुलगा बाहेर आला. तो म्हणाला अरे वाह, परवा तुमचा बंदिनीचा एपिसोड बघितला. म्हटलं धन्यवाद. तो म्हणाला कसं काय येणं केलत? मी त्याला सांगितलं की मी येऊन गेलो होतो. आपल्याकडे पेइंग गेस्ट म्हणून राहायला येणार होतो. तो म्हणाला की आम्ही पेइंग गेस्ट सिस्टिम बंद केली. तेव्हा माझ्या लक्षात आलं की आजी तर म्हणाल्या की पेइंग गेस्ट जुना येतोय आणि हा तर म्हणतोय की ती सिस्टिमच बंद केली. तर मला काही कळेना. त्यावेळी मुंबईत स्वत:चं घर परवडत नव्हतं. लग्न झालं होतं. मुलगी झाली होती.

पुढे अशोक शिंदे म्हणाले, “मी तिथून निघालो. त्यानंतर दादरमधील पोपटलाल चाळ आहे, तिथं मी दोन रात्री बाहेर काढल्या. बाहेर एक भूर्जीची गाडी होती आणि एक पाव भाजीची गाडी होती.त्याच्यासमोर चाळीचा एक कट्टा होता. तिथे मी बसून राहायचो. त्यानंतर एक दिवस मला असा निरोप आला की पेइंग गेस्टची जागा आहे. मी भेटायला गेलो. मला जागा मिळाली. १५ दिवसानंतर आजी मला म्हणाल्या अशोक काय झालं खरं सांगू का? तू पहिल्यांदा आलास तेव्हा आम्हाला बरं वाटलं की तू चांगल्या घरचा मुलगा आहे. पण, बंदिनीचा एक एपिसोड आला. त्याच्यात तू त्याच्यात तू ड्रग डीलर दाखवला आहे. तर त्यात तू खूप कांड करतोस. तेव्हा आम्हाला असं वाटलं अशी लोकं आपल्या घरात नको. त्यांचं बोलणं ऐकल्यानंतर मी त्यांना विचारलं की आता कसं बोलावलं? तर त्या वैशाली दांडेकरबरोबरच्या एका मालिकेत माझाी भूमिका अशी होती रस्त्यावरच्या सगळ्या गरीब मुलांना मी माझ्या घरी बोलावतो आणि त्यांच्यासाठी संस्था काढून लग्न न करता त्यांची सेवा करतो. तर हे बघून त्यांनी मला परत बोलावलं होतं”, असे म्हणत अशोक शिंदे यांनी चित्रपटातील भूमिकांचा प्रेक्षकांवर परिणाम होत असे, याबद्दलची आठवण अशोक शिंदे यांनी सांगितली.