चूल आणि मुल सांभाळत स्वतःच्या पायावर उभ्या राहणाऱ्या आज कित्येक महिला त्यांच्या आवडीच्या क्षेत्रात उत्तम काम करत आहेत. घराच्या चार भिंतींमधून बाहेर पडत आताच्या स्त्रियांनी विविध क्षेत्रात नावलौकीक मिळवलं. पण अनेकदा नेहमीच्या धकाधकीच्या जीवनात, करिअर करत असताना आपल्याला हवी ती गोष्ट करणं राहून जातं. बऱ्याच कलाकारांच्या बाबतीतही हे घडतं.
स्त्रिया नोकरी, त्यांचं काम, कुटुंबामध्ये रमतात. पण याव्यतिरिक्त त्यांनी त्यांची आवडली जोपासली पाहिजे. याबाबतच सुप्रसिद्ध अभिनेत्री वंदना गुप्ते यांनी भाष्य केलं आहे. केदार शिंदे दिग्दर्शित ‘बाईपण भारी देवा’ येत्या ३० जूनला चित्रपटगृहांमध्ये दाखल होणार आहे. या चित्रपटाच्या टीमने ‘लोकसत्ता ऑनलाइन’च्या ‘डिजिटल अड्डा’ला हजेरी लावली होती. यावेळी “अजूनही तुमची अशी कोणती इच्छा आहे जी कामाच्या गडबडीमध्ये करायची राहून गेली? तसेच यापुढे तुम्हाला तुमची राहून गेलेली इच्छा पूर्ण करायला आवडेल का?” असा प्रश्न विचारण्यात आला.
त्यावेळी वंदना गुप्ते म्हणाल्या, “मी प्रत्येक टप्प्यावर थांबत गेले आणि माझ्या ज्या राहिलेल्या गोष्टी होत्या त्या मी पूर्ण केल्या. मला फॅशन डिझायनिंगची खूप आवड होती. म्हणून मी अभिनयक्षेत्रामधून दोन वर्ष ब्रेक घेतला. दोन वर्षांमध्ये माझी जी हौस होती ती मी पूर्ण करुन घेतली. त्यामधून मी पैसेही कमावले”.
“फॅशन डिझायनिंग करत असताना मी माझे ड्रेस बाहेर विकले. त्या पैश्यांमधून अमेरिकेमध्ये शिकत असलेल्या माझ्या मुलाची एक वर्षाची फी भरली. मी पैसेही कमावले, हौसही पूर्ण केली. माझी हौस भागल्यानंतर पुन्हा मी माझ्या कामाला लागले. प्रत्येक टप्प्यावर आपण सतत नवीन काही ना काही तरी केलं पाहिजे. काहीच केलं नाही तर आपण म्हातारे होत जाऊ. नवीन गोष्टी करत राहा”. वंदना यांच्याकडून बऱ्याच गोष्टी शिकण्यासारख्या आहेत.
