दिग्दर्शक केदार शिंदे यांचा ‘बाईपण भारी देवा’ या चित्रपटाची सध्या सर्वत्र चर्चा सुरु आहे. या चित्रपटाचा ट्रेलर काही दिवसांपूर्वी प्रदर्शित झाला. या चित्रपटाच्या ट्रेलरला प्रेक्षकांचा भरभरुन प्रतिसाद मिळताना दिसत आहे. नुकतंच केदार शिंदे यांनी अभिनेता अंकुश चौधरीची पत्नी आणि अभिनेत्री दीपा परब-चौधरी हिच्यासाठी एक खास पोस्ट केली आहे.
केदार शिंदे हे सोशल मीडियावर चांगलेच सक्रीय असतात. नुकतंच त्यांनी दीपा परबबरोबरचा एक फोटो पोस्ट केला आहे. त्याबरोबरच त्यांनी तिच्याबरोबरच्या आठवणीही शेअर केल्या आहेत. यावेळी त्यांनी दीपा आणि अंकुशची लव्हस्टोरीही सांगितली आहे.
आणखी वाचा : Video : “साडीच्या रंगाचा परकर मिळाला नाही का?” रील व्हिडीओमुळे मानसी नाईक ट्रोल
केदार शिंदेंची पोस्ट
“हा माझा आणि दीपा परब-चौधरीचा पहिला एकत्र फोटो. दिपाला मी college पासून ओळखतो. अंकुश भरत दिपा सगळे MD college मध्ये होते. पुढे माझ्या पहिल्या व्यावसायिक नाटकातून दिपाने पदार्पण केलं. अंकुशच्या प्रेमात तर ती तेव्हा college पासून अखंडपणे बुडाली होती. कालांतराने माझ्या मनोमनी या मोहन जोशी सोबत नाटकातही ती प्रमुख भूमिकेत होती. खुप एकत्र काम केलं. आणि… एकेदिवशी ती माझी वहिनी झालीच. अंकुश चौधरी या माझ्या मित्रांसोबत आज ती संसारात सुखासमाधानाने नांदते आहे.
१२ वर्षांच्या गॅपनंतर तिने माझ्या बाईपणभारीदेवा या चित्रपटातून पुर्नआगमन केलं आहे. झी मराठीची “तू चाल पुढं” ही मालिका या चित्रपटाच्या नंतरची. पण आधी ती प्रदर्शित झाली. आणि आज दिपा स्टार आहे. प्रमोशनसाठी गेल्यावर तीची क्रेझ दिसते. खुप आनंद वाटतो. पण जे तिने बाईपणभारीदेवा चित्रपटात काम केलं आहे ते पाहून ती किती प्रगल्भ कलावंत आहे, ते समजतं. तुम्ही या माझ्या वहिनीच्या कामावर प्रचंड प्रेम कराल याची खात्री आहे. आणि खुप धन्यवाद अंकिता या फोटोसाठी!!”, अशी पोस्ट केदार शिंदेंनी केली आहे.
दरम्यान केदार शिंदे दिग्दर्शित ‘बाईपण भारी देवा’ या चित्रपटात रोहिणी हट्टंगडी, वंदना गुप्ते, सुकन्या कुलकर्णी, सुचित्रा बांदेकर, शिल्पा नवलकर, दीपा चौधरी या अभिनेत्री मुख्य भूमिकेत असणार आहेत. तर याबरोबरच अभिनेते शरद पोंक्षे, पियुष रानडे यांच्याही या चित्रपटात महत्वपूर्ण भूमिका आहेत. ‘बाईपण भारी देवा’ चित्रपटाचं कथानक महिलांभोवती फिरणारं असलं तरी त्यांच्याशी जोडल्या गेलेल्या प्रत्येक पुरुषालाही हा चित्रपट बरंच काही सांगून जाणार आहे. हा चित्रपट ३० जून रोजी प्रदर्शित होणार आहे.
