‘नाद – द हार्ड लव्ह’ हा मराठी चित्रपट सतत वेगवेगळ्या कारणांमुळे चर्चेत राहिला आहे. दिमाखदार संगीत प्रकाशन सोहळ्यानंतर या चित्रपटाचा लक्षवेधी टीझर रसिकांच्या भेटीला आला आहे. ‘नाद’चा टीझर समाजमाध्यमांवर प्रदर्शित करण्यात आला असून यात एक संगीतमय प्रेमकथा पाहायला मिळणार आहे. हा चित्रपट २५ ऑक्टोबरला संपूर्ण महाराष्ट्रात प्रदर्शित होणार आहे.
शकुंतला क्रिएशन प्रॉडक्शन आणि जिजाऊ क्रिएशन मेकरच्या बॅनरखाली निर्माते संजय पगारे आणि रुपेश दिनकर यांनी ‘नाद – द हार्ड लव्ह’ चित्रपटाची निर्मिती केली आहे. दिग्दर्शन प्रकाश जनार्दन पवार यांनी केलं असून टीझरची सुरुवातच मुळात ‘नाद’ची व्याख्या सांगणारी आहे. टीझरमध्ये गावाकडच्या लाल मातीतून नागमोडी वाट काढत जाणारा काळाभोर डांबरी रस्ता आणि त्यावर बुलेटची सवारी करणारा नायक लक्ष वेधून घेतो.
हेही वाचा >>> ‘दि ए आय धर्मा स्टोरी’चे २५ ऑक्टोबरला प्रदर्शन
‘नाद’ म्हणजेच ध्यास जेव्हा श्वासातून रक्तात उतरतो, तेव्हा काय होतं ते टीझरमध्ये सांगितलं आहे. थोडक्यात काय तर गावाकडच्या लाल मातीत, हिरवा शालू नेसलेल्या शेतात रंगलेली रांगडी प्रेमकथा ‘नाद’मध्ये पाहायला मिळेल हे टीझर पाहिल्यावर जाणवतं. प्रेम हा शब्द लिहायला, वाचायला, म्हणायला जरी सोपा असला तरी प्रेम झाल्यावर किती आव्हानांना सामोरं जावं लागतं त्याची झलकही यात आहे. सुरेल गीत-संगीत ही या चित्रपटाची जमेची बाजू ठरणार आहे, असे दिग्दर्शक प्रकाश पवार यांनी सांगितले.
‘नाद’ची कथा संतोष दाभोळकर आणि दीपक पवार यांनी, तर पटकथा व संवादलेखन डॉ. विनायक पवार यांनी केलं आहे. वैभव देशमुख यांच्या साथीने विनायक पवार यांनी गीतलेखनही केलं असून ही सर्व गाणी पंकज पडघन यांनी संगीतबद्ध केली आहेत. ‘देवमाणूस’ मालिकेतील अभिनेता किरण गायकवाड आणि सपना माने या नव्या कोऱ्या जोडीची कमाल या चित्रपटात रसिकांना भुरळ पाडणार आहे. याखेरीज यशराज डिंबळे, तानाजी गालगुंडे, किरण माने, विजय पाटकर, जयवंत वाडकर, कमलेश सावंत, सूरज पवार, विनायक पवार, श्रीकांत गायकवाड, गणेश पदमाळे, आशिष वारंग आदी कलाकारांनीही या चित्रपटामध्ये विविधांगी भूमिका साकारल्या आहेत.
