मराठी कलाविश्वातील कलरफुल अभिनेत्री पूजा सावंत आणि सिद्धेश चव्हाण यांचा साखरपुडा १६ फेब्रुवारीला थाटामाटात पार पडला. गेल्यावर्षी नोव्हेंबर महिन्यात जोडीदाराबरोबर रोमँटिक फोटो शेअर करत पूजाने लवकरच लग्न करणार असल्याचं सांगितलं होतं. तेव्हापासून तिच्या चाहत्यांच्या मनात अभिनेत्रीच्या लग्नाबद्दल उत्सुकता निर्माण झाली होती. अखेर शुक्रवारी ( १६ फेब्रुवारी २०२४) गुपचूप साखरपुडा उरकत अभिनेत्रीने चाहत्यांना सुखद धक्का दिला आहे.
पूजा व सिद्धेश शुक्रवारी सायंकाळी मीडियासमोर आले आणि दोघांनी आपल्या हातातल्या अंगठ्या कॅमेऱ्यासमोर दाखवत साखरपुडा पार पडल्याचं सांगितलं. पूजाने या सोहळ्यात पारंपरिक आणि वेस्टर्न असे दोन लूक केले होते. पहिल्यांदा अभिनेत्रीने हिरवी पैठणी साडी, नाकात नथ असा पारंपरिक लूक केला होता. तर, सिद्धेशने यावेळी ऑफ व्हाइट रंगाचा सदरा परिधान केला होता.
साखरपुड्यात अंगठी घालताना दोघांनीही वेस्टर्न लूक केल्याचं पाहायला मिळालं. पूजाने समारंभाच्या पांढऱ्या रंगाच्या थीमनुसार संपूर्ण पांढरा लेहेंगा आणि सिद्धेशने होणाऱ्या बायकोला मॅचिंग अशी पांढऱ्या रंगाची शेरवानी परिधान केली होती.
हेही वाचा : “या फोटोत माझं तोंड बंद आहे म्हणून…”, प्रसाद ओकच्या वाढदिवशी बायकोने शेअर केला ‘तो’ मजेशीर फोटो, म्हणाली…
अभिनेत्रीच्या बहिणीने या सोहळ्याची लहानशी झलक इन्स्टाग्राम स्टोरीमध्ये शेअर केली आहे. यामध्ये भव्य सजावट, पांढऱ्या शुभ्र फुलांमध्ये सोनेरी गुलाबांची आकर्षक मांडणी, पूजा व सिद्धेश यांच्या नावाचा लोगो ( SP ) या सगळ्या गोष्टी पाहायला मिळत आहेत. अभिनेत्रीच्या साखरपुड्याला तिच्या सगळ्या जवळच्या मित्र-मैत्रिणींनी हजेरी लावली होती.
प्रार्थना बेहेरे व तिचा पती अभिषेक जावकर, गश्मीर व गौरी महाजनी, भूषण प्रधान, वैभव तत्त्ववादी, नृत्यदिग्दर्शिका फुलवा खामकर या सगळ्यांनी पूजाच्या साखरपुड्याला खास उपस्थितीत लावली होती. आता लवकरच अभिनेत्री लग्नबंधनात अडकणार आहे.
