अभिनेत्री पूजा सावंत २०२४ मध्ये लग्नबंधनात अडकणार आहे. काही दिवसांपूर्वी सोशल मीडियावर जोडीदाराबरोबरचे रोमँटिक फोटो शेअर करत अभिनेत्रीने प्रेमाची जाहीर कबुली दिली होती. पूजाच्या होणाऱ्या नवऱ्याचं नाव सिद्धेश चव्हाण असं आहे. मुग्धा-प्रथमेश, गौतमी-स्वानंद, स्वानंदी-आशिष या सेलिब्रिटी जोडप्यांनंतर पूजा केव्हा लग्न करणार याबद्दल मराठी प्रेक्षकांच्या मनात उत्सुकता निर्माण झाली आहे. अशातच अभिनेत्रीने शेअर केलेल्या एका रोमँटिक व्हिडीओने सर्वांच लक्ष वेधून घेतलं आहे.
पूजा सावंतने नववर्षाच्या पार्श्वभूमीवर इन्स्टाग्रामवर एक खास व्हिडीओ शेअर केला आहे. या व्हिडीओमध्ये अभिनेत्रीचा होणारा नवरा सिद्धेश, तिला गुडघ्यावर बसून लग्नाची मागणी घालत असल्याचं पाहायला मिळत आहे. सिद्धेशने लग्नासाठी विचारल्यावर दोघांचे मित्र-मैत्रिणी एकच जल्लोष करतात. याशिवाय सिद्धेशने पूजाला प्रपोज करताना गिफ्ट म्हणून डायमंड रिंग दिली आहे. हे ड्रीम प्रपोजल पाहून अभिनेत्री चांगलीच भारावून गेल्याचं या व्हिडीओमध्ये पाहायला मिळत आहे.
पूजा या रोमँटिक व्हिडीओच्या कॅप्शनमध्ये लिहिते, “परिकथेसारखं प्रेम होऊ शकतं यावर विश्वास ठेवणं काही काळासाठी मी बंद केलं होतं. परफेक्ट जोडीदार ही फक्त काल्पनिक गोष्ट आहे असं मला वाटायचं. पण सिद्धेशला भेटल्यावर या सगळ्या गोष्टी बदलल्या. माझ्या परिकथेतील ‘मिस्टर परफेक्ट’ मला सापडला. हा व्हिडीओ म्हणजे फक्त २०२३ ची आठवण नसून या १.२० मिनिटांमध्ये मी नव्या आयुष्याची सुरुवात करण्याचा निर्णय घेतला. २०२४ चं एकत्र स्वागत करण्यासाठी सज्ज होऊया…काहीसं दडपण आहे पण, मला माहितीये तू कायम माझ्याबरोबर आहे. आय लव्ह यू मिस्टर चव्हाण! थँक्यू २०२३.”
दरम्यान, सिद्धेश चव्हाणने लग्नाची मागणी घातल्यावर पूजा या व्हिडीओमध्ये भावुक झाल्याचं पाहायला मिळत आहे. नेटकऱ्यांनी या व्हिडीओवर कौतुकाचा वर्षाव करत अभिनेत्रीला पुढील आयुष्यासाठी भरभरून शुभेच्छा दिल्या आहेत.
