प्रथमेश परब आणि क्षितीजा घोसाळकर यांनी फेब्रुवारी महिन्यात लग्नगाठ बांधत एका नव्या आयुष्याला सुरुवात केली. गेल्या तीन वर्षांपासून हे दोघं एकमेकांना डेट करत होते. जानेवारी महिन्यात केळवणाचा फोटो शेअर करत प्रथमेशने त्याच्या सर्व चाहत्यांना सुखद धक्का दिला होता. अभिनेत्याने १४ फेब्रुवारीला म्हणजेच ‘व्हॅलेंटाईन डे’च्या दिवशी थाटामाटात साखरपुडा केला. यानंतर बरोबर १० दिवसांनी म्हणजेच २४ फेब्रुवारीला प्रथमेश-क्षितीजाचं लग्न पारंपरिक पद्धतीने पार पडलं. या दोघांच्या लग्नाला मराठी मनोरंजन विश्वातील बरील कलाकारमंडळी उपस्थित होती.
प्रथमेश-क्षितीजा इन्स्टाग्रामवर कायम सक्रिय असतात. त्यांचा चाहतावर्ग मोठ्या प्रमाणात आहे. ‘टाईमपास’, ‘टकाटक’, ‘बालक पालक’, ‘डिलिव्हरी बॉय’ अशा चित्रपटांमधून अभिनेता प्रथमेश परब घराघरांत लोकप्रिय झाला होता. त्यामुळे आपल्या आवडत्या अभिनेत्याला खऱ्या आयुष्यातली ‘प्राजू’ भेटल्यामुळे त्याचे सर्वच चाहते सध्या आनंदी आहेत. नुकतीच प्रथमेश आणि क्षितीजाने मिळून त्यांची लग्नानंतरची पहिली वटपौर्णिमा साजरी केली. यावेळी आपल्या बायकोच्या जोडीने अभिनेत्याने देखील उपवास पकडला होता.
वटपौर्णिमा सणासाठी प्रथमेश आणि क्षितीजा दोघंही कोकणात गेले होते. दोघेही जोडीने कोकणातील श्रीवर्धन येथे पोहोचले आहेत. याठिकाणी क्षितिजाचं गाव आहे. लग्नानंतर पहिल्यांदाच गावी गेलेल्या जावयाचं घोसाळकरांनी जोरदार स्वागत केल्याचं पाहायला मिळालं. याशिवाय प्रथमेशने देखील क्षितीजाच्या गावी छान असा वेळ घालवला. याचा खास व्हिडीओ या दोघांनी इन्स्टाग्रामवर शेअर केला आहे.
कोकणातील सुंदर मंदिरं, हरिहरेश्वर समुद्रकिनारा, सासरवाडीत उकडीचे मोदक, गावचा पाऊस, गरमागरम चहा, भर पावसात कोकणातील रस्त्यावर जोडीने बाईक राइडचा आनंद या सगळ्या गोष्टी क्षितीजाने शेअर केलेल्या व्हिडीओमध्ये पाहायला मिळत आहे. तिने या व्हिडीओला “श्रीवर्धन स्टोरीज #प्रतिजा…” असं कॅप्शन दिलं आहे. नेटकऱ्यांनी या दोघांच्या सुंदर व्हिडीओवर कौतुकाचा वर्षाव केला आहे.
दरम्यान, प्रथमेश आणि क्षितिजा गेली ३ वर्षे रिलेशनशिपमध्ये होते. सोशल मीडियावर त्यांची पहिली ओळख आणि त्यानंतर दोघांमध्ये मैत्री झाली होती. पुढे, या मैत्रीचं रुपांतर प्रेमात होऊन प्रथमेश-क्षितीजाने आयुष्याच्या एका नव्या प्रवासाला सुरुवात करण्याचा निर्णय घेतला आणि २४ फेब्रुवारीला लग्नगाठ बांधली.
