मराठमोळा लूक आणि ऐतिहासिक भूमिका; ‘रामायण’ फेम अरुण गोविल व दीपिका चिखलिया ३७ वर्षांनी ‘या’ चित्रपटातून प्रेक्षकांच्या भेटीला

त्यांच्या अभिनयाची जादू पुन्हा एकदा प्रेक्षकांना अनुभवता येणार आहे. श्रीरामनवमीच्या निमित्ताने या दोघांचे एक आकर्षक पोस्टर प्रदर्शित झाले आहे. ‘वीर मुरारबाजी.. पुरंदर की युद्धगाथा’ या हिंदी चित्रपटात ही जोडी छत्रपती शहाजीराजे भोसले आणि राजमाता जिजाऊ यांच्या भूमिकेत दिसणार आहे. या पोस्टरमधील त्यांचा मराठमोळा लूक प्रेक्षकांचे लक्ष वेधून घेत आहे. या चित्रपटाची निर्मिती भाऊसाहेब आरेकर यांनी केली असून चित्रपटाचे दिग्दर्शन अजय-अनिरुद्ध यांनी केले आहे.

ऐतिहासिक चित्रपटात एकत्रित काम करण्याचा योग या निमित्ताने जुळून आला असून या भूमिकेसाठी आम्ही तितकेच उत्सुक होतो, असं मत अरुण गोविल व दीपिका चिखलिया यांनी व्यक्त केले आहे. छत्रपती शहाजीराजे भोसले आणि राजमाता जिजाऊ यांची भूमिका करायला मिळणं आमच्यासाठी खूपच आनंददायी होतं. ज्या उत्तुंग व्यक्तिमत्वांनी आपला प्रेरणादायी इतिहास घडवला, समाजाला नवा विचार दिला, अशी भूमिका साकारताना सोबत मोठी सामाजिक जबाबदारी नक्कीच असते, असे मत या कलाकारांनी व्यक्त केले आहे.

पुरंदरच्या वेढ्याप्रसंगी झालेल्या धुमश्चक्रीत महान पराक्रम गाजवणाऱ्या नरवीर मुरारबाजी देशपांडे यांचा पराक्रमी इतिहास आजही प्रेरणा देणारा आहे. स्वराज्याच्या इतिहासात पुरंदरचे ‘काळभैरव’ म्हणून ओळख असणारे मुरारबाजी देशपांडे यांची यशोगाथा ‘वीर मुरारबाजी…पुरंदर की युद्धगाथा’ या चित्रपटातून प्रेक्षकांना पाहायला मिळणार आहे. आता हा चित्रपट कधी प्रदर्शित होणार हे पाहणे महत्त्वाचे ठरणार आहे.