रितेश देशमुख व जिनिलीया देशमुखच्या ‘वेड’ चित्रपटाने संपूर्ण महाराष्ट्राला वेड लावलं. ‘वेड’नंतर शाहरुख खानच्या ‘पठाण’सह इतर चित्रपटही प्रदर्शित झाले. पण याचा रितेश-जिनिलीयाच्या चित्रपटावर कोणताच परिणाम झाला नाही. आता चित्रपट प्रदर्शित होऊन ५० दिवस उलटले आहेत. तरीही चित्रपटगृहांमध्ये ‘वेड’ पाहण्यासाठी प्रेक्षक जात आहेत. यादरम्यानचाच एक व्हिडीओ रितेश-जिनिलीयाने सोशल मीडिया अकाऊंटद्वारे शेअर केला आहे.
शाहरुख खानच्या ‘पठाण’ चित्रपटाला प्रेक्षकांचा प्रचंड प्रतिसाद मिळाला. पण त्याचबरोबरीने रितेश व जिनिलीयाचा ‘वेड’ चित्रपट पाहण्यासाठीही प्रेक्षक विसरले नाहीत. ‘सैराट’ चित्रपटानंतर सर्वाधिक कमाई करणारा हा दुसरा मराठी चित्रपट ठरला. ५० दिवसांनंतर या चित्रपटाने बॉक्स ऑफिसवर कितपत कमाई केली हे आता समोर आलं आहे.
प्रदर्शनाच्या ५० दिवसांमध्ये या चित्रपटाने जगभरात ७४ कोटी रुपयांची कमाई केली आहे. मराठी चित्रपटसृष्टीसाठी ही अभिमानास्पद गोष्ट आहे. मराठीमध्ये सर्वाधिक चालणाऱ्या चित्रपटांमध्ये आता ‘वेड’चाही समावेश झाला आहे. मध्यंतरी व्हॅलेंटाईन डेनिमित्त रितेशने प्रेक्षकांसाठी खास ऑफर ठेवली होती.
आणखी वाचा – “आता त्या व्यक्तीचं तोंडही बघणार नाही” ‘बिग बॉस १६’चं विजेतेपद मिळाल्यानंतर कोणावर भडकला एमसी स्टॅन?
‘वेड’ कोणत्याही चित्रपटगृहामध्ये फक्त ९९ रुपयांमध्ये दाखवण्यात आला. १४ ते १६ फेब्रुवारी ही ऑफर होती. याचाच या चित्रपटाला सर्वाधिक फायदा झाला. आता ‘वेड’च्या यशानंतर हे मराठमोळं कपल आणखी कोणता नवा मराठी चित्रपट घेऊन प्रेक्षकांच्या भेटीला येणार का? हे पाहावं लागेल.
