रितेश देशमुख व जिनिलीया देशमुख कलाविश्वातील बहुचर्चित कपल आहे. या दोघांकडे एक आदर्श कपल म्हणून पाहिलं जातं. सध्या रितेश व जिनिलीया त्यांच्या ‘वेड’ चित्रपटामुळे चर्चेत आहेत. रितेशने या मराठी चित्रपटामध्ये दिग्दर्शन क्षेत्रामध्ये पाऊल ठेवलं आहे. तर जिनिलीयाचा हा पहिलाच मराठी चित्रपट आहे. या चित्रपटानिमित्त ‘लोकसत्ता ऑनलाइन’च्या ‘डिजिटल अड्डा’मध्ये हजेरी लावली होती.
रियान आणि राहील नावाची दोन मुलं आहेत. या मुलाखतीदरम्यान रितेशने त्याच्या खासगी आयुष्याबाबत भाष्य केलं. चित्रपट करत असताना त्याचा आपल्या मुलांवर काय परिणाम होतो याचा तुम्ही विचार करता का? असा प्रश्न रितेशला या मुलाखतीमध्ये विचारण्यात आला. यावेळी रितेशने अगदी स्पष्ट शब्दांमध्ये उत्तर दिलं.
पाहा व्हिडीओ
तो म्हणाला, “या चित्रपटामधील माझा लूक पाहून माझ्या मुलांनी मला विचारलं की तुमच्या तोंडामध्ये काय आहे. सिगरेट म्हणजे काय? असंही विचारलं. आम्ही लोकांच्या तोंडामध्ये हे पाहिलं आहे अशी माझी मुलं मला म्हणाली. त्यावेळी मी त्यांना सांगितलं की हे आरोग्यासाठी धोकादायक आहे. आपण हे काही करत नाही. शिवाय आम्ही दोघंही सिगरेट व दारू पीत नाही.”
एखाद्या गोष्टीबाबत रितेश व जिनिलीयाला त्यांच्या मुलांनी प्रश्न विचारताच ते त्याचं खरं उत्तर त्यांना देतात. शिवाय रितेश व जिनिलीया दोघंही निर्व्यसनी असल्याचं यामधून स्पष्ट झालं. बॉलिवूडमधील हे आदर्श कपल त्यांच्या मुलांनाही देत असलेली वागणूक व संस्कार खरंच कौतुकास्पद आहे.
