Sachin Pilgaonkar : मराठी सिनेविश्वातील एव्हरग्रीन जोडी म्हणजे सचिन व सुप्रिया पिळगांवकर. या दोघांनी मराठीसह बॉलीवूडदेखील गाजवलं आहे. ‘कुंकू’, ‘एकुलती एक’, ‘माझा पती करोडपती’, ‘नवरी मिळे नवऱ्याला’, ‘आम्ही सातपुते’ या चित्रपटांबरोबर सचिन व सुप्रिया पिळगांवकर यांच्या जोडीने मराठीतील अनेक चित्रपट गाजवले आहेत. दोघांच्या अभिनयाचे लाखो चाहते आहेत. सध्या या जोडप्याच्या ‘नवरा माझा नवसाचा २’ या चित्रपटाची चर्चा सुरू आहे. २० सप्टेंबरला चित्रपट प्रदर्शित झाला असून, बॉक्स ऑफिसवर या चित्रपटाने बक्कळ कमाई केली आहे. चित्रपटाच्या यशानंतर सचिन व सुप्रिया पिळगांवकर आपल्या सुट्या एन्जॉय करत आहेत.
सचिन पिळगांवकर पत्नी सुप्रिया पिळगांवकर यांच्यासह भूतान फिरण्यासाठी आले आहेत. येथील सुंदर निसर्गरम्य वातावरण आणि गमती-जमतींचे काही व्हिडीओ आणि फोटो त्यांनी सोशल मीडियावर पोस्ट केले आहेत. पहिल्या फोटोमध्ये या जोडप्याने निसर्गरम्य ठिकाणी एक फोटो काढला आहे. त्यानंतर पुढे त्यांनी येथील सुंदर मंदिरे आणि वास्तूचे काही फोटो पोस्ट केले आहेत. एका फोटोत सचिन पिळगांवकर मक्याचे भाजलेले कणीस खाताना दिसत आहेत.
हेही वाचा : अनिरुद्धच्या भूमिकेसाठी मिलिंद गवळी ‘असा’ करायचे मेकअप; शेअर केला ‘आई कुठे काय करते’च्या सेटवरचा व्हिडीओ
पुढे त्यांनी भूतानमधील पदार्थांचीदेखील माहिती दिली आहे. सुप्रिया व सचिन पिळगांवकर यांनी भूतानच्या एका हॉटेलमध्ये नाश्ता करतानाचा व्हिडीओ पोस्ट केला आहे. येथे त्यांनी बटर टी आणि स्वीट राईस मागवलं आहे. पदार्थांचा आस्वाद घेत हॉटेलमध्ये समोर भूतान संस्कृतीमधील एक नृत्य सादर होत असल्याचं व्हिडीओमध्ये दिसत आहे. तसेच पुढे या जोडप्यानं भूतानमधील बुद्ध पॉइंटलाही भेट दिली आहे. सचिन पिळगांवकर यांनी हे फोटो आणि व्हिडीओ पोस्ट करत कॅप्शनमध्ये लिहिलं, “भूतानमधून सर्वांना सुंदर सुप्रभात. येथील सर्व व्यक्तींच्या चेहऱ्यावर कायम हसू असते.” त्यांच्या या फोटो आणि व्हिडीओंवर चाहत्यांनी लाइक्सचा वर्षाव केला आहे.
हेही वाचा : ‘रंग माझा वेगळा’ फेम अभिनेता आणि शिवानी सोनार लवकरच अडकणार लग्नबंधनात, बॅचलर पार्टीचे फोटो आले समोर
सचिन पिळगांवकर यांनी पत्नी सुप्रियासह २००४ मध्ये आलेल्या ‘नवरा माझा नवसाचा’ चित्रपटातही काम केलं आहे. त्यानंतर तब्बल १९ वर्षांनंतर या जोडीनं पुन्हा एकदा ‘नवरा माझा नवसाचा २’मध्ये काम केलं. त्यामुळे हा चित्रपट पाहण्यासाठी चाहते फार उत्सुक होते. चित्रपटाची घोषणा झाली तेव्हापासूनच सोशल मीडियावर ‘नवरा माझा नवसाचा’ चित्रपटातील गाणी आणि रील्स व्हिडीओ व्हायरल होण्यास सुरुवात झाली होती. ‘नवरा माझा नवसाचा २’ चित्रपट थिएटरमध्ये तब्बल ५० दिवस चालला. ८ ऑक्टोबरपर्यंत या चित्रपटानं बॉक्स ऑफिसवर २१.६८ कोटींची कमाई केली आहे.
