‘रॉकी और रानी की प्रेम कहानी’ हा चित्रपट बॉक्स ऑफिसवर सध्या दमदार कामगिरी करत आहे. चित्रपटाला पहिल्या दोन आठवड्यांमध्ये १०० कोटींचा गल्ला जमावण्यात यश मिळाले आहे. या चित्रपटामधील प्रत्येक व्यक्तिरेखेचे कौतुक करण्यात येत आहे. आलिया भट्ट आणि रणवीर सिंहच्या प्रमुख भूमिका असलेल्या ‘रॉकी और रानी’मध्ये मराठमोळ्या अभिनेत्रीने सर्वांचे लक्ष वेधून घेतले आहे. क्षिती जोगने या चित्रपटात रणवीरच्या आईची भूमिका निभावली आहे. या भूमिकेसाठी खुद्द करण जोहरने तिचे कौतुक केले होते. आता अभिनेत्री सई ताम्हणकरने क्षितीसाठी खास पोस्ट शेअर केली आहे.
सई ताम्हणकर सर्वप्रथम ‘रॉकी और रानी की प्रेम कहानी’ या चित्रपटाचे कौतुक करताना लिहिते, “सर्वांचे मनोरंजन करणारा उत्तम चित्रपट…रणवीर सिंह आणि आलिया भट्ट यांनी नेहमीप्रमाणे त्यांच्या भूमिका फारच सुंदर केल्या आहेत. करण जोहर सर, तुम्ही अप्रतिम कलाकृती सादर केली आहे. आता मी आमच्या मौल्यवान रत्नाबद्दल सांगते. क्षिती… संपूर्ण चित्रपटात तू कमाल केली आहेस. या क्षणाला तुझा खूप जास्त अभिमान वाटत आहे. माझ्याकडून तुला घट्ट मिठी आणि खूप प्रेम!”
सईप्रमाणे सिद्धार्थ चांदेकर, अमृता खानविलकर, अतुल कुलकर्णी, सिद्धार्थ जाधव, क्षितीचा नवरा हेमंत ढोमे असा असंख्य मराठी कलाकारांनी या ‘रॉकी और रानी’ या चित्रपटाचे कौतुक केले आहे. सिद्धार्थ चांदेकरने सुद्धा क्षितीसाठी खास पोस्ट शेअर करत, “तुझा अभिमान वाटतोय…” असे म्हटले आहे.
दरम्यान, ‘रॉकी और रानी की प्रेम कहानी’ या चित्रपटात क्षिती जोगने रॉकी रंधावाच्या आईची भूमिका साकारली आहे. यामध्ये क्षितीसह आलिया भट्ट, रणवीर सिंह, धर्मेंद्र, शबाना आझमी, जया बच्चन यांच्या प्रमुख भूमिका आहेत.
