‘सैराट’ फेम रिंकू राजगुरूने केली नव्या चित्रपटाची घोषणा! मुहूर्त पडला पार, सेटवरचे फोटो केले शेअर

‘जिजाई’ चित्रपटाच्या शूटिंगला लवकरच सुरुवात होणार आहे. नुकताच या चित्रपटाच्या मुहूर्ताचा कार्यक्रम पार पडला. झी स्टुडिओज व कोकोनट फिल्म्स यांनी सोशल मीडियावर याबद्दल पोस्ट शेअर केली आहे. या पोस्टमध्ये रिंकू राजगुरू हातात जिजाई चित्रपटाच्या मुहूर्ताची पाटी घेऊन उभी असलेली दिसत आहे. हा फोटो शेअर करत झी स्टुडिओजने कॅप्शनमध्ये लिहिले, “शुभारंभ झाला, आता आपला आशीर्वाद असू द्या! झी स्टुडिओज व कोकोनट फिल्म घेऊन येत आहेत रिंकू राजगुरूची प्रमुख भूमिका असलेला, नवा कोरा मराठी सिनेमा ‘जिजाई.’” या पोस्टमध्ये रिंकूला टॅग केले आहे. अभिनेत्रीने ही पोस्ट तिच्या इन्स्टाग्राम अकाउंटवर शेअर केली आहे.

नवोदित दिग्दर्शक तृशांत इंगळे दिग्दर्शित ‘जिजाई’ चित्रपटात रिंकू राजगुरू प्रमुख भूमिकेत दिसणार आहे, तर अपूर्वा शालीग्राम चित्रपटाच्या डीओपी आहेत. कपाळी चंद्रकोर लावलेली रिंकू या चित्रपटात एका वेगळ्याच अंदाजात दिसणार आहे. ‘सैराट’च्या यशानंतर रिंकू राजगुरू आणि झी स्टुडिओज यांच्यात एक वेगळे नाते निर्माण झाले असल्याचे पाहायला मिळत आहे. आता पुन्हा एकदा ‘जिजाई’च्या माध्यमातून लवकरच ती प्रेक्षकांच्या भेटीला येणार आहे.

झी स्टुडिओजचे बवेश जानवलेकर म्हणतात, “झी स्टुडिओजने नेहमीप्रमाणे नवोदित कलाकारांना आणि दिग्दर्शकांना व्यासपीठ उपलब्ध करून दिले आहे. झी स्टुडिओजने प्रेक्षकांसाठी कायमच दर्जेदार आणि वेगळ्या आशयाचे चित्रपट सादर केले आहेत. ‘जिजाई’ हा त्याच परंपरेचा भाग आहे.”

हेही वाचा: Video: गर्दीत चाहत्याने आणलेली विठ्ठलाची मूर्ती पाहिली अन्…; अमिताभ बच्चन यांच्या प्रतिक्रियेचं होतंय कौतुक

दरम्यान, रिंकू राजगुरू चित्रपटांबरोबरच सोशल मीडियावरदेखील सक्रिय असल्याचे पाहायला मिळते. तिने शेअर केलेल्या फोटोंना चाहत्यांची मोठी पसंती मिळताना दिसते. आता रिंकूच्या या नवीन चित्रपटाची प्रेक्षकांना उत्सुकता लागलेली पाहायला मिळत आहे.