मराठी कलाविश्वातील लोकप्रिय अभिनेत्री क्रांती रेडकरने २०१७ मध्ये एनसीबी अधिकारी समीर वानखेडेंबरोबर लग्न केले. समीर आणि क्रांती यांचे महाविद्यालयीन शिक्षण मुंबईतील रुईया कॉलेजमध्ये झाले आहे. १९९७ पासून दोघेही एकमेकांना ओळखत होते. दोघांनीही नुकत्याच दिलेल्या ‘कपल ऑफ थिंग्ज’च्या मुलाखतीत कॉलेजच्या आठवणींना उजाळा दिला आहे. या वेळी समीर वानखेडेंनी पत्नी क्रांती रेडकरबद्दल अनेक खुलासे केले आहेत.
हेही वाचा : “२० वर्षे एकच मोबाइल फोन…”, पंकज त्रिपाठींनी वैयक्तिक आयुष्याबद्दल केला खुलासा; म्हणाले, “मी व्हॉट्सॲप…”
समीर वानखेडे कॉलेजच्या जीवनातील आठवणी सांगत म्हणाले, “५३ मुलींच्या वर्गात आम्ही केवळ ४ मुलं होतो. या मुली प्रचंड दंगा करायच्या क्रांती शेवटच्या बाकावर, तर मी वर्गात पहिल्या बाकावर बसून अभ्यासात मग्न असायचो. क्रांतीला पहिल्यांदा कॉलेजचे जिने चढताना पाहिले तेव्हा माझ्या मनात ही नॉनसेन्स मुलगी कोण आहे? आम्हाला दोघांनाही एकमेकांचा प्रचंड राग यायचा.”
हेही वाचा : “प्रिय पप्पा…”, सासरे विलासराव देशमुख यांच्या आठवणीत जिनिलीयाने शेअर केली भावुक पोस्ट
समीर वानखेडे क्रांतीला नॉनसेन्स का बोलायचे? यामागील कारण सांगताना ते म्हणाले, “कॉलेजमध्ये हजेरी लावण्यासाठी वेगळी लिस्ट देतात त्यावर क्रांती माझ्या नावासमोर मुद्दाम मला त्रास देण्यासाठी सलमान खान किंवा दुसऱ्याच कोणाचे तरी नाव लिहून ठेवायची. मला माहिती होते की, ही तीच नॉनसेन्स मुलगी आहे.” यावर क्रांती म्हणाली, “यांच्यामध्ये प्रचंड रुबाब, एक वेगळीच वृत्ती होती ती मोडून काढण्यासाठी मी त्यांना प्रचंड त्रास द्यायचे.”
“मला त्रास देण्यासाठी क्रांती आणि तिची गुंडांची गॅंग शेवटच्या बाकावरुन दुसऱ्या बाकावर बसायल्या आल्या. मला सारखा मागून हात लावून मला पेन दे…असे सांगायची मी तिला थेट नाही म्हणायचो. अभ्यासाच्या बाबतीत तिला अजिबात गांभीर्य नव्हते. मी हे मान्य करतो की, मला खरंच तिचा खूप राग यायचा. त्यानंतर सगळ्या गोष्टी जुळून आल्या पण, सुरुवातीला आम्हाला एकमेकांचा खूप राग यायचा.” असे समीर वानखेडे यांनी सांगितले.
