“नथुराम गोडसे सादर करताना तो महात्मा गांधींचं वचन…”, संजय मोनेंनी शरद पोंक्षेंच्या ‘त्या’ पोस्टवर केलेली कमेंट चर्चेत

स्नेहच्या चित्रपटाचं नाव अद्याप ठरलेलं नाही, लवकरच त्याबाबत घोषणा करू, स्नेह पोंक्षे लिखीत दिग्दर्शित हा सिनेमा दिवाळी २४ पर्यंत प्रदर्शित करण्याचा प्रयत्न आहे, असं शरद पोंक्षे यांनी लिहिलं होतं. त्यावर कमेंट करत अभिनेते संजय मोने म्हणाले, “मी त्यात काम करतो आहे, विनाअट कारण शरदने नथुराम गोडसेचे काम करताना आणि असंख्य अडचणीचा सामना करतांना कुठल्याही तथाकथित रंगकर्मींकडे “मी व्यक्त होतोय, मला उचलून धरा”असं कधीही सांगितलं नाही.
थोडक्यात नथुराम गोडसे सादर करताना तो महात्मा गांधींचं वचन अवलंबत होता
“एकला चालो रे!” याहून गंमत काय असणार आहे?
व्यक्तिशः मी त्या सगळ्या गोष्टींच्या तत्वांशी सहमत नाही पण ना मी गांधी पाहिले ना मी नथुराम गोडसे पाहिले…त्यामुळे न पाहिलेल्या लोकांच्या बाबतीत काही बोलणे हे गैरलागू आहे.
शेवटी शरद पोंक्षे हा माझा मित्र आहे आणि त्याच्या मुलाच्या चित्रपटात काम करणं हे माझ्यासाठी एक मैत्रीबंधन आहे.”
संजय मोनेंच्या कमेंटवर शरद पोंक्षे यांनी उत्तर दिलं. “व्वा संजय लव्ह यू यार. किती छान व्यक्त होतोस आणि हे ऋण कधीही न विसरता येणारं,” असं ते म्हणाले.

मुलाच्या पहिल्या चित्रपटाबद्दल निर्माते शरद पोंक्षे यांनी भावना व्यक्त केल्या होत्या. “एका नवीन भूमिकेतून तुमच्या भेटीला येत आहे. विशेष म्हणजे मुलाच्या सोबतीने ही वेगळी भूमिका साकारत आहे. यापूर्वी स्नेहने पाच वर्षं सह-दिग्दर्शक म्हणून काम केले आहे आणि या चित्रपटाच्या निमित्ताने तो दिग्दर्शनात पदार्पण करत आहे. मला खात्री आहे, तो ही जबाबदारी उत्तमरित्या पेलेल,” असं ते स्नेहबद्दल म्हणाले होते.