अभिनयक्षेत्रामध्ये असणारी घराणेशाही कित्येकदा चर्चेचा विषय ठरते. अनेक कलाकार मंडळी घराणेशाहीबाबत खुलेपणाने बोलताना दिसतात. हा वादाचा मुद्दा अजुनही संपला नाही. घराणेशाही म्हटलं की, वादाला तोंड फुटतं. कंगना रणौत तर या मुद्द्यावर बऱ्याचदा भरभरुन बोलताना दिसते. इतकंच नव्हे तर घराणेशाहीवरुन करण जोहरवरही आजवर अनेक आरोप करण्यात आले आहेत. आता अभिनेता श्रेयस तळपदेनेही याबाबत भाष्य केलं आहे.
झी मराठी वाहिनीवरील ‘खुपते तिथे गुप्ते’ या कार्यक्रमामध्ये श्रेयस तळपदे हजेरी लावणार आहे. अवधूत गुप्तेच्या या शोचं हे तिसरं सीझन आहे. या शोच्या दुसऱ्या भागात श्रेयस उपस्थित राहिल. या भागामध्ये श्रेयस त्याच्या खासगी आयुष्याबाबत भाष्य करताना दिसेल. त्याचबरोबरीने कलाक्षेत्रामधील अनेक विषयांवरही तो बोलणार आहे.
या कार्यक्रमाचे प्रोमोही समोर आले आहे. याच प्रोमोमध्ये अवधूत त्याच्याबरोबर एक गेम खेळताना दिसत आहे. अवधूत त्याला काही पत्र देणार आहे. त्यातील पत्र तो कोणाला देऊ इच्छितो हे श्रेयसला सांगायचं आहे. यामध्ये अवधूत एक पत्र त्याला देतो. त्यामध्ये असं वाक्य लिहिलेलं असतं की, “आता भेटलात पुन्हा भेटू नका”. श्रेयसने याचं दिलेलं उत्तर सगळ्यांच्याच भूवया उंचावणारं आहे.
“आता भेटलात पुन्हा भेटू नका” हे पत्र तुला कोणाला द्यायला आवडेल?” असं अवधूत श्रेयसला विचारतो. तेव्हा श्रेयस म्हणतो, “हे फक्त एखाद्या व्यक्तीपर्यंत जाऊ शकत नाही. घराणेशाही करणाऱ्या सगळ्यांना मला हे पत्र द्यायचं आहे की, आता भेटलात पुन्हा नका भेटू”. श्रेयसच्या या वक्तव्यावरुन त्यालाही घराणेशाहीचा सामना करावा लागला असल्याचं दिसतं.
