मराठी मनोरंजनसृष्टीत सध्या ‘सुभेदार’ चित्रपटाची जोरदार चर्चा सुरु आहे. येत्या २५ ऑगस्टला हा चित्रपट प्रेक्षकांच्या भेटीला येणार आहे. ‘सुभेदार’च्या निमित्ताने पहिल्यांदाच मृणाल कुलकर्णी त्यांचा लेक विराजस कुलकर्णी आणि त्याची पत्नी शिवानी रांगोळे हे तिघेही एकत्र काम करणार आहेत. कुलकर्णी कुटुंब एकाच चित्रपटात काम करण्याची ही पहिलीच वेळ आहे. चित्रपटात तिघांनाही वेगवेगळ्या भूमिका केल्या आहेत. नुकतीच शिवानी रांगोळेने लाडक्या सासूबाईंचे कौतुक करत सोशल मीडियावर पोस्ट शेअर केली आहे.
हेही वाचा : सिद्धार्थ चांदेकरच्या आईने केलं दुसरं लग्न, नेटकरी म्हणाले, “इतका मोठा निर्णय घेण्यासाठी…”
अभिनेत्री मृणाल कुलकर्णी यांनी संपूर्ण शिवराज अष्टत मालिकेत राजमाता जिजाबाईंची भूमिका साकारली आहे. त्यामुळे सामान्य माणसांमध्ये आणि विशेषत: शिवप्रेमींमध्ये त्यांची ‘आऊसाहेब’ अशी ओळख निर्माण झाली आहे. आता सासूबाई मृणाल कुलकर्णींचे कौतुक करण्यासाठी अभिनेत्री शिवानी रांगोळेने खास पोस्ट शेअर केली आहे. यामध्ये ती लिहिते, “समस्त शिवराय प्रेमींसाठी आऊसाहेब असणारी व्यक्ती माझ्यासाठी ताई आहे याचा अभिमान आणि आनंद, ‘सुभेदार’ चित्रपटात एकत्र काम करून द्विगुणित झाला! या क्षणाबद्दल दिग्पाल लांजेकर यांचे खूप खूप धन्यवाद!!!”
शिवानी आणि विराजसने ३ मे २०२२ रोजी लग्न केले. दोघेही अनेक वर्षांपासून एकमेकांना डेट करत होते. शिवानी आणि मृणाल कुलकर्णी यांच्यामध्ये सासू-सूनेपेक्षा मैत्रीचे नाते आहे. म्हणूनच शिवानी सासूबाईंना ताई या नावाने हाक मारते. या पोस्टमध्येही शिवानीने मृणाल कुलकर्णी यांचा उल्लेख ताई असा केला आहे.
दरम्यान, ‘सुभेदार’ हा श्री शिवराज अष्टक मालिकेतील पाचवा चित्रपट येत्या दोन दिवसांत प्रेक्षकांच्या भेटीला येणार आहे. या ऐतिहासिक चित्रपटाची कथा सुभेदार तानाजी मालुसरे यांच्या जीवनावर आधारित आहे. चित्रपटात मृणाल कुलकर्णी यांनी ‘राजामाता जिजाऊ’ यांची भूमिका साकारली आहे. तर, अभिनेत्री शिवानी रांगोळेने सूर्याजी मालुसरे यांच्या पत्नीची भूमिका साकारली आहे. विराजस कुलकर्णी बहिर्जी नाईक यांच्या गुप्तहेर समूहात ‘जीवा’ ही भूमिका साकारताना आपल्याला दिसेल.
