“माझा चित्रपट सुपरहिट होऊदे”, ‘झापुक झुपूक’साठी सूरज चव्हाणचं खंडोबा चरणी गाऱ्हाणं, म्हणाला, “तुमचा लेक…”

सूरजला घेऊन एक चित्रपट करणार असून या चित्रपटाचं नाव ‘झापुक झुपूक’ असणार, असं केदार शिंदे यांनी जाहीर केलं होतं. त्यानंतर डिसेंबर २०२४ च्या अखेरीस चित्रपटाचा मुहूर्त सोहळा पार पडला आणि आता चित्रपटाचं चित्रीकरण यशस्वीरित्या पूर्ण झालं आहे, त्यामुळे सोशल मीडियावर प्रसिद्ध असणारा सूरज आता मराठी सिनेसृष्टी गाजवण्यासाठी सज्ज झाला आहे. अशातच आता या चित्रपटासाठी सूरज जेजूरीमधील खंडोबाच्या चरणी गेला आहे, केदार शिंदेंनी त्यांच्या सोशल मीडियावर याचा व्हिडीओ शेअर केला आहे.

या व्हिडीओमध्ये सूरज चव्हाण येळकोट येळकोट जय मल्हार असा जयजयकार करत म्हणतो की, “खंडोबा पप्पा तुमच्या दर्शनाला आलो आहे. माझा पिक्चर सुपर डुपर हिट झाला पाहिजे”. त्यानंतर सूरज गाभाऱ्यात जात दर्शन घेतो. यावेळी त्याच्या चित्रपटाचे पोस्टर खंडोबा चरणी ठेवलं जातं. यावेळी सूरज असं म्हणतो की, “देवबाप्पा मी तुमच्या दारात आलो आहे. येत्या २५ तारखेला माझा ‘झापुक झुपूक’ चित्रपट येत आहे. मला असा आशीर्वाद द्या की, माझा चित्रपट मार्केट मध्ये धिंगाणा घालू द्या. तुमचा लेक तुमच्या भेटीला आलो आहे धन्यवाद.”

या व्हिडीओमध्ये सूरज खंडोबाच्या दर्शनाला पोहोचताच त्याच्या भोवती चाहत्यांची गर्दी जमा होते. सगळे जण त्याच्याबरोबर फोटो व सेल्फी काढण्यासाठी एकत्र येतात. तर सूरजदेखील सर्वांना सेल्फी देतो. शिवाय या व्हिडीओत तो त्याच्या चित्रपटाचे पोस्टर हातात घेऊन ‘येळकोट येळकोट जय मल्हार’ असा जयजयकारही करतात. त्याचा हा व्हिडीओ सध्या सोशल मीडियावर व्हायरल होत असून अनेकांनी त्याला त्याच्या नवीन चित्रपटासाठी शुभेच्छा दिल्या आहेत.

दरम्यान, केदार शिंदे दिग्दर्शित ‘झापुक झुपूक’ चित्रपटात सूरज चव्हाणसह इंद्रनील कामत, हेमंत फरांदे, पायल जाधव, जुई भागवत, पुष्कराज चिरपूटकर, मिलिंद गवळी व दीपाली पानसरे ही कलाकार मंडळीदेखील झळकणार आहेत. या चित्रपटाची निर्मिती ज्योती देशपांडे, बेला शिंदे व जिओ स्टुडिओजने केली आहे. येत्या २५ एप्रिलपासून हा चित्रपट प्रेक्षकांच्या भेटीला येणार आहे