“लवकर बरं व्हायचं आहे”, तेजस्विनी पंडितला नेमकं झालंय तरी काय? पोस्टवर स्वप्नील जोशी, सिद्धार्थ जाधवने केल्या कमेंट्स

अभिनेत्री तेजस्विनी पंडितने नुकतीच सोशल मीडियावर तिचे काही फोटो शेअर केले आहेत. या फोटोंमध्ये ती अत्यंत सुंदर दिसत आहे. हे फोटो शेअर करताना अभिनेत्रीने लिहिलेय, “काहीच कृत्रिम नको. सकाळचा चेहरा असाच असतो नाही का?
सध्या शरीराचंदाह खूप आहे आणि त्यावर काम चालू आहे. लवकर बरं व्हायचं आहे. सगळ्यात आधी आरोग्य हा या वर्षीचा संकल्प नाही, तर ध्यास आहे”, असे लिहित या वर्षी आरोग्याकडे लक्ष देण्यावर भर देणार असल्याचे अभिनेत्रीने लिहिले आहे.

अभिनेत्रीच्या या फोटोंवर अनेक चाहत्यांनी कमेंट्स करत अभिनेत्रीचे कौतुक केले आहे. “खूप सुंदर”, असे म्हणत एका नेटकऱ्याने तेजस्विनीचे कौतुक केले आहे. तर एका नेटकऱ्याने म्हटले, “तू माझी सर्वांत आवडती अभिनेत्री आहेस.” तर इतर अनेक नेटकऱ्यांनी हार्ट इमोजी शेअर करीत प्रेम व्यक्त केले आहे. या सगळ्यात स्वप्नील जोशी, सिद्धार्थ जाधव या अभिनेत्यांनीही हार्ट इमोजी शेअर केल्याचे दिसत आहे.

हेही वाचा: ‘स्पायडरमॅन’ फेम अभिनेता टॉम हॉलंड आणि अभिनेत्रीने झेंडाया यांनी उरकला साखरपुडा? ‘त्या’ अंगठीमुळे चर्चांना उधाण

तेजस्विनी पंडितच्या कामाबद्दल बोलायचे, तर अभिनेत्रीने ‘अगं बाई अरेच्चा’ या चित्रपटातून अभिनय क्षेत्रात पदार्पण केले. मी सिंधुताई सपकाळ, ये रे ये रे पैसा, तू ही रे या चित्रपटांत तेजस्विनीने मुख्य भूमिका साकारल्या आहेत. तसेच, तुझं नी माझं घर श्रीमंताचं या मालिकेत तिने काम केले आहे. समांतर, अहो विक्रमार्का, रान बाजार, १०० डेज यांमधील तिच्या भूमिकांनी लक्ष वेधून घेतले होते.