Urmila Kothare Car Accident : मराठी सिनेसृष्टीतील लोकप्रिय अभिनेत्री उर्मिला कोठारेच्या गाडीचा भीषण अपघात झाल्याचं वृत्त २८ डिसेंबरला समोर आलं. मुंबईतील कांदिवलीमधील पोईसर मेट्रो स्थानकाजवळ हा भीषण अपघात झाला. उर्मिलाच्या गाडीने दोन मुजरांना उडवलं. ज्यामध्ये एकाचा मृत्यू झाला तर एक गंभीर जखमी झाला आहे. तसंच या अपघातात उर्मिला स्वतः आणि चालक जखमी झाले. त्यामुळे तातडीने जमखींना रुग्णालयात दाखल करण्यात आले. पण, या भीषण अपघाताप्रकरणी उर्मिला कोठारेच्या चालकाला अटक केल्याची माहिती समोर आली आहे.
पोलिसांनी दिलेल्या माहितीनुसार, उर्मिला कोठारेच्या गाडीचा अपघात शुक्रवारी मध्यरात्री १२.५४च्या सुमारास झाला. उर्मिला आपल्या मैत्रिणीला भेटून घरी परतत असताना हा अपघात झाला. याआधी मागे सीटवर बसलेल्या मैत्रिणीला जोगेश्वरी येथे उर्मिलाने सोडले. त्यानंतर ठाणे-घोडबंदर मार्गे घरी जात असताना कांदिवलीतील पोईसर मेट्रो स्थानकाजवळ चालक गजानन पाल याचे गाडीवरचे नियंत्रण सुटले.
वरिष्ठ पोलीस निरीक्षक अनिल पाटील म्हणाले, “चौकशीदरम्यान चालक आणि अभिनेत्रीने सांगितलं की, एका वाहन चालकाने भरधाव वेगात येऊन त्यांच्या गाडीला ओव्हरटेक केलं. त्यामुळे त्या गाडीला धडकू नये म्हणून उर्मिलाचा चालक प्रयत्न करत असतानाच गाडीवरचा ताबा सुटला आणि ती उलटली. त्यानंतर गाडी एका बॅरिकेडला आदळली. त्यामुळे पुढे जाऊन गाडीने मेट्रो स्थानकाजवळ काम करणाऱ्या दोन मजुरांना उडवलं. यात सम्राटदास जितेंद्र नावाच्या मजुराचा मृत्यू झाला असून सुजन रविदास हा जखमी झाला आहे. तसंच जखमी झालेल्या उर्मिलावर खासगी रुग्णालयात उपचार सुरू आहेत.
उर्मिला कोठारेच्या गाडी अपघाताप्रकरणी समता नगर पोलीस ठाण्यात गुन्हा दाखल करण्यात आला आहे. ‘इंडियन एक्सप्रेस’च्या वृत्तानुसार, चालकाला पोलिसांनी ताब्यात घेतलं आहे. शिवाय एमएच-४७-एजी-७६५७ नंबर असलेली ‘हुंदाई’ गाडी जप्त केली आहे. अपघाताच्या वेळी चालक दारू पिऊन गाडी चालवत होता की नाही? याचा तपास करण्यासाठी रक्ताचे नमुने घेतले आहेत. या भीषण अपघातामागचं नेमकं कारण शोधण्यासाठी पोलिसांचा कसून तपास सुरू आहे.
दरम्यान, उर्मिला कोठारेच्या कामाबद्दल बोलायचं झालं तर, सहा महिन्यांपूर्वी तिच्या ‘तुझेच मी गीत गात आहे’ मालिकेने प्रेक्षकांचा निरोप घेतला. गेली दोन वर्ष प्रेक्षकांचं अविरत मनोरंजन करणाऱ्या या मालिकेत उर्मिलाने वैदहीची भूमिका साकारली होती. ‘तुझेच मी गीत गात आहे’ मालिकेनंतर उर्मिला स्वतःचे डान्स वर्कशॉप घेऊ लागली. याचे व्हिडीओ तिने सोशल मीडियावर शेअर केले होते.
