‘श्रीवर्धनमध्ये आम्हा मापुस्कर कुटुंबियांच्या मालकीचे चित्रपटगृह होते. श्रीवर्धन टॉकीज नावाने ओळखल्या जाणाऱ्या या चित्रपटगृहात मराठी – हिंदीतील अनेक नावाजलेले चित्रपट प्रदर्शित होत असत. त्यावेळी मराठीत दिग्दर्शक राजदत्त यांचे चित्रपट लोकप्रिय होते. प्रेक्षकांनी चित्रपटगृहात चित्रपट पाहायला यावे म्हणून त्यांच्या चित्रपटांचे पोस्टर्स आम्ही गावात लावत असू. आज त्याच राजदत्त यांच्या हस्ते दिग्दर्शक म्हणून माझ्या पहिल्या चित्रपटाच्या पोस्टरचे अनावरण आम्ही केल’, अशा शब्दांत रोहन मापुस्कर यांनी आपला आनंद व्यक्त केला.
मराठी तसेच हिंदी चित्रपटसृष्टीत स्वत:ची स्वतंत्र ओळख निर्माण करणारे राष्ट्रीय पारितोषिक विजेते दिग्दर्शक-निर्माते राजेश मापुस्कर आणि कास्टिंग दिग्दर्शक म्हणून लोकप्रिय असलेले रोहन मापुस्कर यांचा ‘एप्रिल मे ९९’ हा चित्रपट येत्या उन्हाळ्याच्या सुट्टीत म्हणजे, १६ मे २०२५ रोजी चित्रपटगृहात प्रेक्षकांच्या भेटीला येणार आहे. या चित्रपटाची निर्मिती या दोघा भावांनी एकत्र येऊन मापुस्कर ब्रदर्स या नावाने केली असून फिंगर प्रटिं फिल्म्स, नेक्सस अलायन्स, थिंक टँक आणि मॅगीज पिक्चर्स प्रस्तुत ‘एप्रिल मे ९९’ हा चित्रपट येत्या उन्हाळ्याच्या सुट्टीत धमाल घेऊन येणार आहे. या चित्रपटाच्या पोस्टरचे अनावरण मराठी चित्रपटसृष्टीतील ज्येष्ठ दिग्गज दिग्दर्शक राजदत्त यांच्या हस्ते करण्यात आले. या प्रसंगी निर्माते जोगेश भूटानी यांनी शाल आणि श्रीफळ देऊन राजदत्त यांचा सत्कार करून आशीर्वाद घेतले.
नुकत्याच प्रदर्शित झालेल्या पोस्टरमध्ये चार तरुण त्यांच्या सायकलींसोबत उभे असल्याचे दिसते. या तरुणांच्या वर निळेशार आकाश आणि समोर समुद्र पाहायला मिळत आहे. हा चित्रपट प्रेक्षकांना मैत्री, स्वप्न आणि तारुण्याच्या भावविश्वात घेऊन जाणारा असेल. ‘एप्रिल मे ९९’ असे नाव असल्याने हा चित्रपट उन्हाळ्याच्या सुट्टीतील कुटुंबातील लहान मोठ्या सर्वांच्या सुट्टीतील रम्य आठवणींशी जोडला जाणार आहे. चित्रपटात कलाकार कोण असतील? हे अजून गुलदस्त्यातच आहे.
निर्माते राजेश मापुस्कर म्हणतात, श्रीवर्धनमध्ये असलेला आमचा मापुस्कर कुटुंबाचा सिनेमा हॉल आम्हा दोन भावांसाठी जणू एक चित्रपट शाळाच ठरला. तिथे राजदत्त यांचे चित्रपट पाहत आम्ही मोठे झालो आणि इतकेच नाही तर आम्ही त्यांच्या प्रत्येक चित्रपटाचे पोस्टर श्रीवर्धन आणि आजूबाजूच्या गावांमध्ये जाऊन चिकटवायचो. आज आम्ही त्यांच्याच हस्ते रोहनच्या पहिल्या चित्रपटाचे ‘एप्रिल मे ९९’ चे पोस्टर प्रदर्शित केले यापेक्षा मोठा आनंद दुसरा कोणता असू शकतो? त्यांच्या शुभेच्छांमुळे आमच्या प्रवासाला एक वेगळे बळ मिळाले असून त्यांचे हे आशीर्वाद आम्हाला कायम प्रेरित करतील. तर आजवर आयुष्याच्या प्रवासात आम्ही अनुभवलेले क्षण, चित्रपटांची जादू आणि कलेची आस हे सर्व एकत्र होऊन हा नवा चित्रपट आकाराला आला आहे. प्रेक्षकांचे प्रेम या चित्रपटाला मिळेल, असा विश्वास चित्रपटाचे लेखक, दिग्दर्शक रोहन मापुस्कर यांनी व्यक्त केला. राजेश मापुस्कर, मधुकर कोटीयन, जोगेश भूटानी , मॉरिस नून हे निर्माते आहेत तर लॉरेन्स डिसोझा सह निर्माते आहेत.
