“साहेबांच्या हिंदुत्त्वाची गोष्ट उलगडणार…”, प्रवीण तरडेंकडून ‘धर्मवीर २’ची अधिकृत घोषणा, पहिलं पोस्टर समोर

मंगेश देसाई यांनी नुकतंच इन्स्टाग्रामवर एक पोस्ट शेअर केली आहे. त्यात मंगेश देसाई, प्रवीण तरडे हे जेजुरीमधील खंडोबाचं दर्शन घेताना दिसत आहे. यावेळी त्यांच्या हातात धर्मवीर २ चित्रपटाचे पहिलं पोस्टरही पाहायला मिळत आहे. यानंतर आता लवकरच धर्मवीर चित्रपटाच्या चित्रीकरणाला सुरुवात होणार असल्याचेही त्यांनी सांगितले.
आणखी वाचा : ‘धर्मवीर २’बाबत प्रसाद ओकची खास पोस्ट, मुख्यमंत्री एकनाथ शिंदेंचाही केला उल्लेख, म्हणाला, “माझ्या आयुष्यातल्या…”

मंगेश देसाई यांची पोस्ट

“धर्मवीर मुक्काम पोस्ट ठाणे भाग 1 च्या माध्यमातून धर्मवीर आनंद दिघे साहेबांचं चरित्र सगळ्या जनतेसमोर आलं. धर्मवीर आनंद दिघे साहेब यामाध्यमातून सर्व जगात पोहोचले आणि ‘असा माणूस होणे नाही’ हेही सर्वांना समजलं.

त्यांचा आयुष्यातील अशा भरपूर गोष्टी आहेत ज्या जनतेसमोर येणं गरजचं आहे, म्हणूनच ‘धर्मवीर – मुक्काम पोस्ट ठाणे – भाग 2 ह्याचं चित्रीकरण आम्ही सुरू करतोय, लवकरच…बघुया धर्मवीर मुक्काम पोस्ट ठाणे 2… साहेबांच्या हिंदुत्वाची गोष्ट, लवकरच…”, असे कॅप्शन त्यांनी या फोटोला दिले आहे.

आणखी वाचा : “सरकारने ठरवलं तर टॅक्स…” प्रसाद ओकने पत्नीबरोबर शेअर केलेला ‘तो’ व्हिडीओ चर्चेत

‘धर्मवीर २’ या चित्रपटाच्या पहिल्या पोस्टरवर भगव्या रंगावर ‘धर्मवीर २’ असे लिहिण्यात आले आहे. त्याखाली ‘साहेबांच्या हिंदुत्त्वाची गोष्ट…’ अशी टॅगलाईनही देण्यात आली आहे. त्यामुळे हा चित्रपट हिंदुत्त्वावर भाष्य करणारा असल्याचं बोललं जात आहे. या चित्रपटाचे लेखन आणि दिग्दर्शन प्रविण तरडे करणार आहेत. तर मंगेश देसाई हे या चित्रपटाची निर्मिती करत आहेत. आता या चित्रपटात कोण कोणते कलाकार झळकणार हे मात्र अद्याप गुलदस्त्यात आहेत. मात्र ‘धर्मवीर २’च्या घोषणेमुळे चित्रपटाविषयी प्रचंड उत्सुकता निर्माण झाली आहे.